تخم واخلي او پۀ زمکه کښې به يـې وَکري، (پۀ جَنَّت کښې خو خواري نشته، له څنګه به چې دے تخم وکري نو) هٰغه وخت به د غرونو همره اوچت فصل راوټوکيږي۔^([1])

يو اِيمان تازه کوونکے مَدَني ګل

خوږو او محترمو اِسلامي وروڼو! مونږ روايت واوريدو چې پۀ جَنَّت کښې به انسان د زميدارې خواهش اوکړي، پۀ دې ځائے کښې د قرآنِ کريم مشهور مفسر، حکيم الاُمّت مفتي احمد يار خان نعيمي رَحْمَةُ اللهِ عَلَيْه يوه ايمان تازه کوونکې نکته بيان کړې ده، هغوئي ليکلي دي چې خلق پۀ کوم حالت کښې ژوند کوي، پۀ هٰغه حالت کښې به مړه کيږي او پۀ کوم حالت کښې چې مړۀ کيږي، پۀ هٰغه حالت کښې به د قيامت پۀ ورځ راپاڅي۔ دا کوم کَس چي پۀ جَنَّت کښې د زميدارې خواهش کوي، دا به پۀ اصل کښې هٰغه کَس وي کوم چې پۀ ژوند کښې زميداره کوله، د دۀ پۀ دُنيا کښې د زميدارې سره شوق وو، پۀ داسې حالت کښې دا مړ شو، ځکه به هغۀ ته پۀ جَنَّت کښې هم د زميدارې سوچونه ورځي۔^([2])

د دې نه معلومه شوه چې څوک پۀ دې دُنيا کښې د خوږ آقا و مولا، مکي مَدَني مصطفٰے صَلَّى اللهُ عَلَيْهِ وَاٰلِهٖ وَسَلَّم ذِکر پۀ ذوق او شوق سره کوي، د چا پۀ زړۀ کښې چې هر وخت د مدينے منورې يادونه وي، د خوږ آقا و مولا، مکي مَدَني مصطفٰے صَلَّى اللهُ عَلَيْهِ وَاٰلِهٖ وَسَلَّم د ديدار د پاره ليواله وي، د قيامت پۀ ورځ به پۀ جَنَّت کښې هم د هغوئي دغه سوچ وي، اِنْ شَآءَ اللہُ الْکَرِیم! عاشقانِ رسول به پۀ عشقِ رسول کښې خوشحاله خوشحاله راپاڅي۔ ^([3])