هُن ويچاريءَ کي ڪهڙي خبر ته منهنجو مڙس ڪهڙي مالڪ وٽ مزدوري ڪري رهيو آهي. ان عبادت گذار نيڪ شخص زال جي ڳالهه ٻڌي ته پريشان ٿي ويو، سڄي رات ڏک ۽ پريشاني جي حالت ۾ پاسا وَرائيندي گذري وئي. ٽئين ڏينهن وري مزدوريءَ جي لاءِ نڪتو، اڄ به کيس ڪم نه مليو، وري به درياهه جي ڪناري تي پهتو، وضو ڪيائين ۽ عبادت ۾ مشغول ٿي ويو.

سڄو ڏينهن ته عبادت ۾، الله پاڪ جي ياد ۾ مگن رهي گذري ويو، جڏهن شام ٿي ۽ گهر وڃڻ جو وقت ٿيو ته کيس پريشاني گهيري وئي، هاڻي هي نيڪ شخص گهر ڏانهن هلندو پئي ويو، هٿَ اڄ به خالي هئا، سندس پير ڳورا ٿي رهيا هئا، کيس بار بار اِهو خيال سَتائي رهيو هو ته ٻارن کي ڇا چوندس؟ ڪهڙو دلاسو ڏيندس؟ اِهو سوچيندي سوچيندي پريشانيءَ جي عالم ۾ گهر ڏانهن هلي رهيو هو، جڏهن گهر جي ويجهو پهتو ته ڇا ٿو ڏسي ته گهر مان بهترين کاڌن جي خوشبو اچي رهي آهي، ائين پئي لڳو ڄڻ ته اندر خوشين جو ماحول آهي، هڪ لمحي لاءِ کيس لڳو ته شايد مان ڪنهن ٻئي جي گهر آيو آهيان، پوءِ جڏهن دروازو کڙڪايائين ته سندس زال کلندي مسڪرائيندي خوشي وِچان دروازو کوليو ۽ کيس ڏسندي ئي چيائين: توهان جنهن مالڪ وٽ ڪم ڪندا آهيو، اُهو واقعي وڏو ڪريم آهي، اڄ توهان جي وڃڻ کان پوءِ ان جو قاصد آيو هو، هن تمام گهڻي رقم ۽ کاڌي جون شيون ڏنيون ۽ چيائين: جڏهن توهان جو گهروارو اچي ته کيس سلام چئجو ۽ ٻڌائجو ته توهان جو مالڪ توهان جي عمل مان راضي آهي ۽ هي توهان جي محنت جو صِلو آهي. ^([1])

پيارا اسلامي ڀائرو! واقعي سچي ڳالهه آهي، جيڪو نيڪ رستو اختيار ڪندو آهي، الله پاڪ ان جا سمورا بگڙيل ڪم سنواري ڇڏيندو آهي. اَلحمدُ لِلّٰہ! رمضان مبارڪ اچي رهيو آهي، هي هڪ مهينو اسان الله پاڪ جي نالي ڪري ڇڏيون، پڪو ذهن بڻائي ڇڏيون ته اسان کي رمضان مبارڪ ۾ پنهنجي رب سان خوب محبتن جو اظهار ڪرڻو آهي.