د ږيرې د خريلو يا د يو موټي نه د کمولو ګناه خو نۀ ده کړې؟ ^([1])

ږيره څۀ ته وئيلے شي؟

د غوږونو نه لاندې پۀ شقيقه [يعنې د سر اړخ]، د داړو د پاسه او پۀ زنه باندې راختونکو ويښتو ته ږيره وئيلے شي۔ ^([2])

وضاحت: * د سترګو او د غوږونو ترمينځه ځائے له چې لاس وروړې نو يو راوتے هډوکے به محسوس شي، دې ته شقيقه [يعنې د سر اړخ] وئيلے شي، د دې نه لاندې د داړو هډوکے دے، د کوم د بره طرف ته چې پۀ خُله کښې دننه غاښونه راخيژي، د دې هډوکي هٰغه حصه کومه چې د شونډو نه لاندې ده، هغې ته زنه وئيلے شي۔ پۀ دې دريو واړو هډوکو باندې چې کوم ويښته راخيژي، هغه ږيره ده * د لاندې شونډې او د زنې ترمينځه څۀ ويښته وي، دې ته پۀ عربۍ کښې عَنفَقَه او پۀ پښتو کښې وړۀ ږيره وئيلے شي، دا هم پۀ ږيره کښې داخله ده * د بعضې خلقو پۀ غوږونو باندې ويښته وي، داسې پۀ اننګو باندې نري نري ويښته د چا لږ او د چا د سترګو پورې وي، دا پۀ ږيره کښې شامل نۀ دي۔ ^([3]) * دغه شان د زنې نه لاندې پۀ مرۍ باندې ويښته راخيژي، هغه هم د ږيرې حصه نۀ ده۔ ^([4])

د خوږ مصطفٰے صَلَّى اللهُ عَلَيْهِ وَاٰلِهٖ وَسَلَّم فرمان مبارک

خَالِفُوا الْمُشْرِکِیْنَ اَوْفُوْا  اللِّحْیَ  ، وَاحْفُوْا الشَّوَارِبَ 

ترجمه: د غيرمسلمو مخالفت اوکړئ۔۔۔! ږيرې اوږدې کړئ۔۔۔! او بريتونه ښه واړۀ ساتئ۔۔۔! ^([5])