الله پاڪ پسند ناهي فرمائيندو

   نبين جي نبي، رسولِ هاشمي صَلَّى اللهُ عَلَيْهِ وَاٰلِهٖ وَسَلَّم جن فرمايو: الله پاڪ تڪبر ڪرڻ وارن ۽ آڪڙجي هلڻ وارن کي پسند ناهي فرمائيندو. ^([1])

بدترين شخص

   حضرت حذيفه رَضِیَ اللهُ عَنْہُ فرمائن ٿا: هڪ ڏينهن اسان محبوبِ ذيشان صَلَّى اللهُ عَلَيْهِ وَاٰلِهٖ وَسَلَّم جن سان گڏ هڪ جنازي ۾ شريڪ هئاسين، پاڻ صَلَّى اللهُ عَلَيْهِ وَاٰلِهٖ وَسَلَّم جن فرمايو: ڇا مان توهان کي الله پاڪ جي بدترين ٻانهي بابت نه ٻڌايان؟ فرمايائون: اهو بداخلاق ۽ تڪبر ڪندڙ آهي. پوءِ فرمايائون: ڇا مان توهان کي الله پاڪ جي بهترين ٻانهي بابت نه ٻڌايان؟ فرمايائون: اهو ڪمزور سمجهيو ويندڙ، پراڻن ڪپڙن وارو شخص آهي، جيڪڏهن هو ڪنهن ڳالهه تي قسم کڻي وٺي ته الله پاڪ ان جو قَسم پورو فرمائي ڇڏيندو آهي. ^([2])

جنت ۾ داخل نه ٿي سگهندو

حديثِ پاڪ ۾ ارشاد ٿيو: جنهن جي دل ۾ سرنهن جي داڻي برابر (يعني ٿورو به) تڪبر هوندو، اهو جنت ۾ داخل نه ٿيندو. ^([3])

لشڪر جي سالار کي نصيحت

   حضرت مُطرف بن عبدالله رَحۡمَةُ اللهِ عَلَيۡه هڪ لشڪر جي سپهه سالار مُهلب کي آڪڙجي هلندي ڏٺو ته فرمايائون: اي الله جا ٻانها! الله ۽ ان جي رسول کي اها چال پسند ناهي. ان جواب ۾ چيو: ڇا تون مون کي نٿو سڃاڻين ته مان ڪير آهيان؟ فرمايائون: ڇو نه، مان توکي خوب سڃاڻان ٿو، تنهنجو آغاز هڪ ناپاڪ قطري سان ٿيو، انجام ۾ تون بدبودار مردار ٿي ويندين ۽ انهن ٻنهي حالتن جي وچ ۾ تون پيٽ ۾ ناپاڪي کنيو گهمين ٿو. اهو ٻڌي مُهَلَّب شرمندو ٿي هليو ويو. ^([4])