مونږ پۀ نيکو اعمالو کولو د اخرت تياري اوکړو او که نۀ، مرګ به بهر حال راځي او ضرور به راځي، حضرت ملک المَوت عَلَیْهِ السَّلَام نۀ مخکښې چا له مهلت ورکړے دے او نۀ به يـې مونږ له راکوي. ځکه عقلمند هغه دے څوک چې هُم پۀ ژوند کښې مرګ ياد وساتي او د دې د پاره تياري کوي. پۀ 29 سيپارۀ سورۀ مُلک، آيت: 2 کښې الله پاک فرمائي:

الَّذِیْ خَلَقَ الْمَوْتَ وَ الْحَیٰوةَ لِیَبْلُوَكُمْ اَیُّكُمْ اَحْسَنُ عَمَلًاؕ-

ترجمهٴ کنزُ العِرفان: هٰغه ذات چا چې مرګ او ژوند پيدا کړل د پاره د دې چې ستاسو ازميښت اوکړي چې پۀ تاسو کښې څوک زيات ښه اعمال کوونکے دے.

علمائے کرامو د دې آيت يوه معنیٰ دا بيان کړې ده چې الله پاک ژوند او مرګ پيدا کړو د پاره د دې چې ستاسو ازميښت اوشي چې پۀ تاسو کښې څوک مرګ ياد ساتي او د دې د پاره پوره تياري کوي؟ ^([1])

حضرت ملک المَوت عَلَیْهِ السَّلَام ټولو ته ګوري

اِمام جلال الدين سيوطي رَحْمَةُ اللهِ عَلَيْه ليکلي دي: حضرت ملک المَوت عَلَیْهِ السَّلَام روزانه هر کور ته 5 کرته او د يو روايت مطابق 7 کرته تشريف راوړي او ګوري چې دلته څوک خو داسې نشته د چا د رُوح د قبض کولو حکم چې راکړے شوے وي. ^([2])

الله! الله! خوږو او محترمو اِسلامي وروڼو! غور اوکړئ چې څومره د عبرت خبره ده، مونږ د غفلت ښکار اوسو، پۀ ګناهونو کښې مشغول اوسو، بل طرف ته د خوندونو ختموونکے حضرت ملک المَوت عَلَیْهِ السَّلَام هر وخت زمونږ پۀ انتظار کښې ناست دے،