الله پاڪ اسان کي ماهِه رمضان ڏسڻ، ان ۾ خوب روزا رکڻ ۽ خوب عبادت ڪرڻ نصيب فرمائي۔ رمضان شريف جي هڪ اهم ترين عبادت اعتڪاف به آهي۔ نفلي اعتڪاف ته ڪنھن به وقت ڪري سگهجي ٿو پر جيڪو اعتڪاف سنتِ مؤڪده آهي، اهو رمضان شريف  ۾ ئي ٿيندو آهي. پياري آقا، مڪي مدني مصطفيٰ صَلَّى اللهُ عَلَيْهِ وَاٰلِهٖ وَسَلَّم کان پوري ماهِه رمضان جو اعتڪاف ڪرڻ به ثابت آهي جڏھن ته آخري ڏهاڪي جو اعتڪاف ته اسان جي آقا و مولا، تاجدارِ انبياء صَلَّى اللهُ عَلَيْهِ وَاٰلِهٖ وَسَلَّم کي تمام گھڻو محبوب هو، پاڻ صَلَّى اللهُ عَلَيْهِ وَاٰلِهٖ وَسَلَّم آخري ڏهاڪي جي اعتڪاف جو تمام گھڻو اهتمام فرمائيندا هئا۔ ايسيتائين جو هڪ دفعي ڪنھن سبب کان رمضان شريف ۾ اعتڪاف نه ٿي سگهيو ته پاڻ          صَلَّى اللهُ عَلَيْهِ وَاٰلِهٖ وَسَلَّم شوال ۾ اعتڪاف فرمايو. ^([1])

اعتڪاف  جون  فضيلتون

 * مسلمانن جي پياري امڙ حضرت عائشه صديقه رَضِیَ اللهُ عَنْہا کان روايت آهي: پياري آقا، مڪي مدني مصطفيٰ صَلَّى اللهُ عَلَيْهِ وَاٰلِهٖ وَسَلَّم ارشاد فرمايو: مَنْ اِعْتَکَفَ اِیْمَاناً وَ اِحْتِسَابًا غُفِرَ لَہٗ مَا تَقَدَّمَ مِنْ ذَنْبِہٖ يعني جنھن ايمان سان ۽ ثواب حاصل ڪرڻ جي نيت سان اعتڪاف ڪيو ته ان جا پويان گناھ بخشيا ويندا. ^([2])  * هڪ ٻي روايت ۾ آهي: جنھن رمضان شريف ۾ 10 ڏينھن جو اعتڪاف ڪري ورتو ته اهو ائين آهي جيئن ان 2 حج ۽ 2 عمرا ڪيا. ^([3])

اجتماعي  سنت  اعتڪاف  جي  ترغيب

  پيارا اسلامي ڀائرو! اَلْحَمْدُ لِلّٰہ! عاشقانِ رسول جي ديني تنظيم دعوتِ اسلامي سڄي دنيا ۾ نيڪيءَ جي دعوت عام ڪرڻ ۾ مصروف آهي، فيضانِ رمضان حاصل ڪرڻ، گناھن کان بچڻ ۽ نيڪ نمازي بڻجڻ جي لاءِ عاشقانِ رسول جي ديني تنظيم دعوتِ اسلامي جي ديني ماحول سان وابسته ٿي وڃو۔