اَلْحَمْدُ لِلہِ رَبِّ الْعٰلَمِیْنَ وَالصَّلٰوۃُ وَالسَّلَامُ عَلٰی خَاتَمِ النَّبِیّٖن

اَمَّا بَعْدُ! فَاَعُوْذُ بِاللہ مِنَ الشَّیْطٰنِ الرَّجِیْمِ ^ط بِسْمِ اللہ الرَّحْمٰنِ الرَّحِیْمِ

اَلصَّلٰوۃُ وَالسَّلَامُ عَلَیْکَ یَارَسُوْلَ اللہ                                        وَعَلٰی آلِکَ وَاَصْحٰبِکَ یَاحَبِیْبَ اللہ

اَلصَّلٰوۃُ وَالسَّلَامُ عَلَیْکَ یَانَبِیَّ اللہ                                                       وَعَلٰی آلِکَ وَاَصْحٰبِکَ یَانُوْرَ اللہ

نَوَیْتُ سُنَّتَ الْاِعْتِکَاف                                                                                                         (ترجمہ: میں نے سُنَّت اعتکاف کی نِیَّت کی)

درودِ پاک کی فضیلت

ایک بزرگ ہوئے ہیں: شیخ ابُو حَفْص کاغذی رَحمۃُ اللہ عَلَیْہ۔ آپ کا جب انتقال ہوا تو چند دِنوں کے بعد اپنے کسی دوست(Friend) کے خواب میں تشریف لائے، دوست نے پوچھا: کیا حال اَحْوال ہیں؟ قبر میں کیا گزری؟ فرمایا: مجھ پر بڑا کرم ہوا، واقعہ یوں پیش آیا کہ جب مجھے قبر میں دفن کر دیا گیا تو منکر نَکِیْر (یعنی قبر میں سُوال پوچھنے والے فرشتے) پہنچ گئے، انہوں نے مجھے اُٹھا کر بٹھایا اور سُوال پوچھنے لگے، اتنے میں اللہ پاک کا فرمان آیا: اے فرشتو! ٹھہر جاؤ...!! فرشتے رُک گئے۔ اب حکم ہوا: اس بندے کے گُنَاہ شُمار (Count) کرو! فرشتوں نے میرے گُنَاہ شُمار کیے، اب تو میں ڈر ہی گیا کہ اتنے گُنَاہ ہوتے ہوئے میں کیسے بخشا جاؤں گا۔ اُدھر سے فرشتوں کو حکم ہوا: اس بندے نے دُنیا میں ہمارے محبوب  صَلَّی اللہ عَلَیْہِ وَ آلِہٖ وَ سَلَّم  پر جو درود شریف پڑھے ہیں، اب انہیں شُمار کرو! فرشتوں نے میرے پڑھے ہوئے درودِ پاک گننا شروع کئے۔ خوش قسمتی سے میرے پڑھے ہوئے درودِ پاک گُنَاہوں سے زیادہ تھے۔ چنانچہ فرشتوں کو حکم ہوا: حَسْبُکُمْ یَامَلَائِکَتِیْ! اے میرے فرشتو! اتنا ہی حساب کافی ہے۔ اِذْہَبُوْا بِہٖ اِلٰی جَنَّتِیْ اس بندے کو میری جنّت میں لے جاؤ!