دیگر کئی بے مثال خوبیوں سے سَرفراز فرماتا ہے،وہیں یہ خوبی بھی اِن کے کِردار کا حِصَّہ ہوتی ہے کہ یہ حضرات لوگوں سے دَرگُزر  فرماتے ہیں اور حُقوقُ العباد کی بجاآوری  میں کوتاہی نہیں کرتے،لوگ اِن کے حُقوق دبالیتے ہیں لیکن یہ حضرات لوگوں کے حُقوق کی ادائیگی سے کبھی غافِل نہیں ہوتے،نادان لوگ اِنہیں طرح طرح کی تکلیفیں دیتے ہیں لیکن یہ حضرات اُنہیں اِینٹ کا جواب پتّھر سے دینے اور نَفْس کی خاطِر غُصّہ کرنے کے بجائے اُنہیں دعائیں دیتے اور مُعافی سے نواز  کر ثواب کا خزانہ لُوٹتے ہیں ۔ آئیے!بطورِ ترغیب اِس  بارے میں3نصیحت آموز حکایات سُنتے ہیں، چنانچہ

(1)غلام کو آزاد کردیا!

حضرت  امام حَسَن مجتبیٰ رَضِیَ اللہُ عَنْہُ ایک مرتبہ چند مہمانوں کے ساتھ کھانا کھارہے تھے ،غلام گرما گرم شوربے کا پیالہ لا رہا تھا کہ اُس کے ہاتھ سے پیالہ گِرا جس کی وجہ سے شوربے کی چھینٹیں آپ رَضِیَ اللہُ عَنْہُ پر بھی آئیں۔یہ دیکھ کر غلام گھبرایا اور شرمندگی بھرے لہجے میں اُس نے سورۂ اٰلِ عمران کی آیت نمبر134 کا یہ حِصَّہ تلاوت کیا:

وَ  الْكٰظِمِیْنَ  الْغَیْظَ  وَ  الْعَافِیْنَ  عَنِ  النَّاسِؕ (پ ۴،آل عمران : ۱۳۴)

تَرْجَمَۂ کنز العرفان :اور غُصَّہ پینے والے او ر لوگو ں سے دَرگُزرکرنے والے ہیں۔

آپ رَضِیَ اللہُ عَنْہُ نے فرمایا:میں نے مُعاف کیا۔ غلام نے پھر اِسی آیت کا آخری حِصَّہ پڑھا:

وَ  اللّٰهُ  یُحِبُّ  الْمُحْسِنِیْنَۚ(۱۳۴) (پ ۴،آل عمران : ۱۳۴)

تَرْجَمَۂ کنز العرفان: اور اللہ نیک لوگوں سے محبت فرماتا ہے۔

آپ رَضِیَ اللہُ عَنْہُ نے فرمایا:میں نے تجھے اللہ پاک کی رضا کے لئے آزاد کیا۔(روح البیان،اٰل عمران ،۲/ ۹۵،تحت الاٰیۃ:۱۳۴ملخصاً)