مطلب ته حضرت آدم عَلَيۡهِ السَّلَام کي خليفو زمين لاءِ بڻايو ويو هو پر کين ڪجهه عرصي لاءِ جنت ۾ رکيو ويو، ان ۾ حڪمت هي هئي ته اسان انسانن لاءِ شيطان جي دشمني واضح ٿي وڃي. ان ڪري اسان سڀني تي لازم آهي ته شيطان کي پنهنجو دشمن سمجهندا رهون.

شيطان کي دشمن سمجهو...!!

الله پاڪ قرآن ڪريم ۾ ارشاد فرمائي ٿو:

اِنَّ الشَّیْطٰنَ لَكُمْ عَدُوٌّ فَاتَّخِذُوْهُ عَدُوًّاؕ-اِنَّمَا یَدْعُوْا حِزْبَهٗ لِیَكُوْنُوْا مِنْ اَصْحٰبِ السَّعِیْرِؕ(۶)

(سيپارو: 22، الفاطر:6)

ترجمو ڪنزُالعرفان: بيشڪ شيطان توهان جو دشمن آهي سو توهان به ان کي دشمن سمجهو، اهو ته پنهنجي ٽولي کي انهيءَ لاءِ سڏي ٿو ته جيئن اهي به دوزخين مان ٿي وڃن.

يعني اي انسانو! شيطان اوهان جو وڏو پراڻو دشمن آهي، ان جي هي دشمني ڪڏهن به ختم نه ٿيندي، ان ڪري اوهان به پنهنجي عقائد جي معاملي ۾، افعال ۽ اعمال جي معاملي ۾ ان خبيث کي پنهنجو دشمن سمجهو! ان جي پويان هرگز نه هلو! (هي ته پڪو جهنمي آهي) ۽ ماڻهن کي ڪفر ڏانهن سڏيندو به ان لاءِ ئي آهي ته جيئن انهن کي به (پاڻ سان گڏ) جهنم ۾ وٺي وڃي. ^([1])

شيطان جي خطرناڪ سازش

اي عاشقانِ رسول! معلوم ٿيو: شيطان اسان جو کُليو دشمن آهي، جيئن هي حضرت آدم عَلَیْهِ السَّلَام جي جنت مان ٻاهر اچڻ جو سبب بڻيو، ايئن ئي هي چاهي ٿو ته اسان جنت کان محروم رهي جهنم جا حقدار ٿي وڃون. ان ڪري اسان کي گهرجي ته هميشه ان جي چالن کان بچندا رهون، ان جون چالون تمام خطرناڪ آهن.