(1): شيطان جي دشمني کي واضح ڪيو ويو

پهرين حڪمت هيءَ آهي ته حضرت آدم عَلَيۡهِ السَّلَام کي جنت ۾ رهايو ويو ته جيئن شيطان جي انسان سان دشمني کي عملي طور تي واضح ڪيو وڃي. شيطان جيڪو حضرت آدم عَلَيۡهِ السَّلَام سان حسد ڪندو هو، جڏهن حضرت آدم عَلَيۡهِ السَّلَام کي جنت ۾ رهايو ويو ته ان کين جنت مان ڪڍڻ جي گهڻي ڪوشش ڪئي، معاذَ الله! وسوسو به ڏياريو، سندن سامهون ڪوڙو قَسم به کنيائين، مطلب ته ان معاذَ الله! حضرت آدم عَلَيۡهِ السَّلَام کي ڀٽڪائڻ جي لاءِ ايڙي چوٽي جي ڪوشش ڪئي پر هي بدبخت نه ڄاڻيندو هو ته حضرت آدم عَلَیْهِ السَّلَام نبي آهن ۽ انبياءِ ڪرام عَلَيۡهِم السَّلَام معصوم هوندا آهن، انهن تي شيطان جا وارَ نه هلندا، البت حڪمت اها ئي هئي، شيطان پنهنجي دشمني واضح ڪري ڇڏي، الله پاڪ حضرت آدم عَلَيۡهِ السَّلَام جي حفاظت فرمائي، پاڻ وسري ويا ۽ ويسر ۾ ئي اهو جنتي ميوو کائي ڇڏيو، ايئن کين گناهه به نه ٿيو ۽ شيطان جي دشمني به کُلي عام سامهون اچي وئي. ^([1])

اي اولادِ آدم! شيطان کان بچو...!!

سيپارو:8، سورت اعراف ۾ حضرت آدم عَلَيۡهِ السَّلَام جو اهو ئي واقعو ذڪر ڪرڻ کان پوءِ الله پاڪ اسان انسانن کي ارشاد فرمايو:

یٰبَنِیْۤ اٰدَمَ لَا یَفْتِنَنَّكُمُ الشَّیْطٰنُ كَمَاۤ اَخْرَ جَ اَبَوَیْكُمْ مِّنَ الْجَنَّة (سيپارو: 8، الاعراف: 27)

ترجمو ڪنزُ العرفان: اي آدم جي اولاد! توهان کي شيطان فتني ۾ نه وجهي جيئن ان توهان جي ماءُ پيءُ کي جنّت مان ڪڍي ڇڏيو.

يعني اي اولادِ آدم! هي ڳالهه هميشه ياد رکو، شيطان اوهان جو کُليو دشمن آهي، اهوئي آهي جيڪو اوهان جي والدين (حضرت آدم ۽ حوا عَلَیْهِما السَّلَام ) جي جنت مان نڪرڻ جو سبب بڻيو، ان ڪري ان ڳالهه جو هميشه لحاظ رکجو ۽ بچجو ته ڪٿي شيطان اوهان کي فتني ۾ نه وجهي.