ارشاد ٿئي ٿو:

وَ لَا تَقْرَبَا هٰذِهِ الشَّجَرَةَ فَتَكُوْنَا مِنَ الظّٰلِمِیْنَ(۳۵) (سيپارو: 1، البقرة: 35)

ترجمو ڪنزُ العرفان: البت هن وڻ جي ويجهو نه وڃجو نه ته حد کان لنگهندڙن ۾ شامل ٿي ويندؤ.

يعني جنت جي هر نعمت کائڻ پيئڻ جي انهن کي اجازت هئي پر هڪ مخصوص وڻ هو، جنهن جي ويجهو وڃڻ يعني ان جو ميوو کائڻ کان انهن کي منع فرمايو ويو، اهو وڻ ڪهڙو هو، ان بابت مختلف روايتون آهن، وڌيڪ مشهور روايت اها آهي ته اهو اناج (يعني ڪڻڪ) جو وڻ هو. ^([1]) اسان وٽ ڪڻڪ جو ننڍڙو ٻوٽو هوندو آهي پر جنت ۾ ان جو وڻ هو ۽ ان جو ميوو يعني ڪڻڪ جو داڻو به ڍڳي جي گُڙدي جيترو هو. ^([2])

فَاَزَلَّهُمَا الشَّیْطٰنُ عَنْهَا فَاَخْرَجَهُمَا مِمَّا كَانَا فِیْهِ۪ (سيپارو: 1، البقرة: 36)

ترجمو ڪنزُ العرفان: پوءِ شيطان انهن ٻنهي کي جنّت مان لغزش ڏني سو انهن کي اتان ڪڍرائي ڇڏيو جتي اهي رهندا هئا.

آدم عَلَیْهِ السَّلَام کي گنهگار چوڻ جو حڪم

پيارا اسلامي ڀائرو! هتي هڪ ڳالهه جيڪا تمام گهڻي اهم آهي ۽ ضروري طور تي ياد رکڻ جي آهي، اها آهي الله پاڪ جي نبي حضرت آدم عَلَيۡهِ السَّلَام جي عصمت (يعني گناهن کان پاڪ هجڻ). اسان وٽ اڄڪلهه بيباڪي عام آهي، ديني معلومات جي گهٽتائي آهي، ماڻهو ڳالهائيندي ڪجهه سوچيندا سمجهندا نه آهن، بس جيڪو وات ۾ آيو ڳالهائيندا رهندا آهن* ڪڏهن انبياءِ ڪرام عَلَيۡهِم السَّلَام جي بي ادبي ٿي رهي هوندي آهي * ڪڏهن جنت ۽ دوزخ جو مذاق اڏايو ويندو آهي *  ڪڏهن فرشتن بابت نامناسب گفتگو ڪندا آهن. اهي تمام سخت ڳالهيون آهن، اهڙين ڳالهين جي ڪري ٻانهو دائرهءِ اسلام مان نڪري به سگهي ٿو. ان ڪري اسان کي اهڙين ڳالهين کان بچڻ گهرجي.