پيارا اسلامي ڀائرو! سيپارو:1، سورت بقرة جي چوٿين رڪوع ۾ حضرت آدم عَلَیْهِ السَّلَام جي پيدائش ۽ سندن زمين تي تشريف آڻڻ جو تفصيلي واقعو بيان ڪيو ويو آهي، سندن تخليق کان  پهريان فرشتن جي سامهون سندن خليفةُ الله هجڻ جو اعلان ڪيو ويو، پوءِ جڏهن کين تخليق ڪيو ويو ته الله پاڪ کين عِلْمُ الْاَسْما عطا فرمايو، فرشتن تي سندن برتري کي ظاهر ڪيو ويو، پوءِ فرشتن کي حڪم ٿيو ته کين سجدو ڪن، تنهنڪري سڀني فرشتن حضرت آدم عَلَیْهِ السَّلَام جي تعظيم لاءِ کين سجدو ڪيو. ها! شيطان بدبخت هو، ان بد انجام تڪبر ڪيو، الله پاڪ جو حڪم ٽاريو ۽ سجدو نه ڪري هميشه لاءِ مردود ٿي ويو. ان کان پوءِ ڇا ٿيو؟ ان جو ذڪر هن آيتِ ڪريمه ۾ آهي جيڪا اسان هاڻي ٻڌڻ جي سعادت حاصل ڪئي.

آيتِ ڪريمه جي مختصر وضاحت

الله پاڪ فرمائي ٿو:

وَ قُلْنَا یٰۤاٰدَمُ اسْكُنْ اَنْتَ وَ زَوْجُكَ الْجَنَّةَ وَ كُلَا مِنْهَا رَغَدًا حَیْثُ شِئْتُمَا۪ (سيپارو: 1، البقرة: 35)

ترجمو ڪنزُ العرفان: ۽ اسان فرمايو: اي آدم! تون ۽ تنهنجي گهرواري جنّت ۾ رهو ۽ بنا روڪ ٽوڪ جي جتان توهان جي دل چاهي کائو.

ساڳئي جنت جيڪا نيڪ ماڻهن لاءِ تيار ڪئي وئي آهي ۽ جنهن ۾ قيامت کان پوءِ داخلا ٿيندي، حضرت آدم عَلَیْهِ السَّلَام ۽ حضرت حوا رَحْمَةُ الـلّٰـهِ عَـلَيْہا کي ان ئي جنت ۾ رهايو ويو. هتي اها ڳالهه به ياد رکڻ جي آهي ته جنت ۾ داخلا 2 طرح جي آهي: (1): هڪ اها داخلا جيڪا قيامت کان پوءِ نصيب ٿيندي، اها بطور ثواب ۽ انعام هوندي، ان ڪري ان وقت جنت ۾ ڪنهن به قسم جي ڪا روڪ ٽوڪ نه هوندي، نه اتي ننڊ هوندي نه موت ۽ نه ئي اهل جنت کي ڪڏهن جنت مان ڪڍيو ويندو (2): پر حضرت آدم عَلَیْهِ السَّلَام جي اها جنت ۾ داخلا بطور ثواب يا انعام نه هئي بلڪه اها داخلا ڪجھ حڪمتن جي تحت هئي، ان ڪري انهن کي اتي ڪجهه شين جي ويجهو وڃڻ کان روڪيو ويو. ^([1])