د حبيب او د خليل فرق

اے د خوږ نبي صَلَّى اللهُ عَلَيْهِ وَاٰلِهٖ وَسَلَّم عاشقانو! دلته د حبيب او د خليل فرق ته هم وګورئ چې حضرت ابراهيم عَلَیْهِ السَّلَام د الله پاک خليل دے، ډير د اوچتې مرتبے نبي دے، زمونږه د آقا، د مدينے والا مصطفٰے صَلَّى اللهُ عَلَيْهِ وَاٰلِهٖ وَسَلَّم نه پس پۀ نبيانو او رسولانو کښې اوچته درجه د هغوئي ده، حضرت ابراهيم عَلَیْهِ السَّلَام هم مِعراج اوکړو، هغوئي ته د زمکې او د اسمان بادشاهي وښودلے شوه، هغوئي د کاڼو پۀ يوه ډيرۍ باندې ودريدلو، حکم وشو: ابراهيمه! ښکته وګورئ! چې اوئې کتل نو اوؤه واړه زمکې او پۀ هغې کښې موجودې د قدرت نخښې يـې وليدلې، بيا حکم وشو: بره وګورئ! هغوئي چې بره وکتل نو اوۀه واړه اسمانونه يـې وليدل۔ ^([1]) الله پاک فرمائي:

وَ كَذٰلِكَ نُرِیْۤ اِبْرٰهِیْمَ مَلَكُوْتَ السَّمٰوٰتِ وَ الْاَرْضِ وَ لِیَكُوْنَ مِنَ الْمُوْقِنِیْنَ(۷۵) (پارہ:7، سورۀ انعام: 75)

[مفهوم] ترجمهٴ کنزُ العِرفان: او هُم دغسې مونږه ابراهيم ته د اسمانونو او زمکې عظيمه بادشاهي ښايو۔

دا د حضرت ابراهيم عَلَیْهِ السَّلَام مِعراج وو خو د حبيب او د خليل فرق ته وګورئ چې حضرت ابراهيم عَلَیْهِ السَّلَام ته د اسمان او د زمکې بادشاهي ښودل منظور وو نو هغوئي پۀ يو کاڼي باندې ودرولے شو او ورته وښودلے شوه خو چې کله يـې د خپل حبيب                             (صَلَّى اللهُ عَلَيْهِ وَاٰلِهٖ وَسَلَّم) نمبر راغلو نو * جنَّت ښائسته کړے شو * پۀ اسمان او زمکه کښې خوشحالۍ خورې کړے شوې * حضرت جبرائيلِ امين عَلَیْهِ السَّلَام د فرښتو د جنج سره جنَّتي بُراق راوستو او حاضر شو * او الله پاک خپل محبوبِ کريم صَلَّى اللهُ عَلَيْهِ وَاٰلِهٖ وَسَلَّم اسمانونو ته نۀ بلکې د اوؤه واړو اسمانونو نه هم بره وغوښتلو او د خپل قُدرت عظيمې نخښې يـې ورته وښودلې، دا دي د حبيب صَلَّى اللهُ عَلَيْهِ وَاٰلِهٖ وَسَلَّم شانونه۔۔۔!!