ليدل خو غټه خبره ده، مونږ هغه پۀ ډيرو ګينټو کښې هم نۀ شو بيانولے ۔ تاسو اندازه ولګوئ چې د خوږ آقا و مولا، مکي مَدَني مصطفٰے صَلَّى اللهُ عَلَيْهِ وَاٰلِهٖ وَسَلَّم د سيرت يو څو سيکنډه چې داسې دي نو آيا بيا د نبي کريم صَلَّى اللهُ عَلَيْهِ وَاٰلِهٖ وَسَلَّم ټول سيرت مبارک بيانول د چا پۀ وس کښې کيدے شي۔۔۔؟ ځکه خو مونږ وايو:

زندگیاں ختم ہوئیں اور قلم ٹوٹ گئے      تیرے اوصاف کا اِک باب بھی پُورا نہ ہوا

خير! د معراج ټول عجائبات خو زۀ بيانولے نۀ شم، يو څو روايتونه مې عرض کړل ، راځئ چې پۀ اخره کښې د سبق نه يو ډک روايت د هٰغه وخت پۀ باره کښې واورو کله چې خوږ آقا و مولا، مکي مَدَني مصطفٰے د الله پاک پۀ حضور کښې پۀ خاص قُرب کښې حاضر وو۔

ورځ شپه او شپه ورځ جوړه کړئ۔۔۔!!

روايت دے: د مِعراج پۀ شپه محبوبِ ذِيشان، مکي مَدَني سلطان صَلَّى اللهُ عَلَيْهِ وَاٰلِهٖ وَسَلَّم عرض اوکړو: يَا رَبِّ!دُلَّنِي عَلَىٰ شَيْءٍ اَتَقَرَّبُ اِلَيْكَ اے کريم مالکه! ماته د داسې عمل راهنمائي اوکړې، د کوم پۀ ذريعه چې زۀ ستا قُرب حاصل کړم۔

اوس دلته وګورئ چې دا سوال جواب زمونږ د ښودلو د پاره دي، ګنې خوږ محبوب                      صَلَّى اللهُ عَلَيْهِ وَاٰلِهٖ وَسَلَّم خو د دې نه مخکښې هم پۀ داسې خاص قُرب کښې حاضر شوے وو، چرته چې څوک هم نشي رسيدے، نۀ د دې نه د زيات نزدې کيدو خيال پۀ ذِهن کښي راتلے شي۔

ځکه دا کومه پوښتنه چې خوږ محبوب صَلَّى اللهُ عَلَيْهِ وَاٰلِهٖ وَسَلَّم اوکړه، يقيناً چې دا يـې مونږ ته د ښودلو د پاره اوکړه، ګويا مقصد دا وو چې اے کريم مالکه! زما اُمت ستا قُرب د کوم عمل پۀ ذريعه حاصلولے شي؟

الله پاک وفرمائيل: اِجْعَلْ لَيْلَكَ نَهَارًا، وَنَهَارَكَ لَيْلًا يعنې اے محبوبه صَلَّى اللهُ عَلَيْهِ وَاٰلِهٖ وَسَلَّم ! زما د قرب موندلو طريقه دا ده چې خپله شپه ورځ او ورځ شپه جوړه کړئ!