بي حساب جنت ڏيارڻ وارا عَمَلَ

پيارا اسلامي ڀائرو! معلوم ٿيو ته ماڻهن کي معاف ڪرڻ بي حساب جنت ڏيارڻ وارو عمل آهي. افسوس! اڄڪلهه هن نيڪي تي عمل ڪرڻ وارا تمام ٿورا ماڻهو نظر اچي رهيا آهن. ڪاوڙ، بغض، ڪينو (يعني دل ۾ دشمني لڪائي رکڻ) تمام عام آهي. ٻين جي ٿورڙي غلطي تي تعلق ٽوڙيا ويندا آهن، دلين ۾ ڳالهيون سانڍيون وينديون آهن ۽ پلاند ورتا ويندا آهن. ڪاش! اسان کي توفيق ملي وڃي ۽ اسان به ٻين کي معاف ڪرڻ وارا بڻجي وڃون.

معاف ڪرڻ افضل عمل آهي

الله پاڪ ارشاد فرمايو آهي:

اِنْ تُبْدُوْا خَیْرًا اَوْ تُخْفُوْهُ اَوْ تَعْفُوْا عَنْ سُوْٓءٍ فَاِنَّ اللّٰهَ كَانَ عَفُوًّا قَدِیْرًا(۱۴۹)(سيپارو: 6، سورة نساء: 149)

ترجموڪنزالعرفان: جيڪڏهن توهان ڪا ڀلائي ظاهر ظهور ڪريو يا لڪي ڪريو يا ڪنهن جي برائي کان درگذر ڪيو ته بيشڪ الله معاف ڪرڻ وارو قدرت وارو آهي.

يعني جيڪڏهن توهان ڪو نيڪ ڪم اعلانيه ڪريو يا لڪائي ڪريو يا ڪنهن جي برائي کان درگذر ڪريو ته اِهو افضل ڪم آهي، ڇوته الله پاڪ سزا ڏيڻ تي هر طرح سان قادر هجڻ جي باوجود به پنهنجن ٻانهن جي گناهن کان درگذر ڪندو آهي ۽ کين معاف فرمائي ڇڏيندو آهي. تنهنڪري توهان به پنهنجي مٿان ظلم ڪرڻ وارن کي معاف ڪريو ۽ ماڻهن جي غلطين کان درگذر ڪريو.^{(^[1])}

سڀني کان وڌيڪ عزت وارو ٻانهو

حضرت ابو ہريرہ رَضِیَ اللهُ عَنْہُ کان روايت آهي ته حضور پر نور صَلَّى اللهُ عَلَيْهِ وَاٰلِهٖ وَسَلَّم فرمايو: حضرت موسيٰ عَلَیْهِ السَّلَام عرض ڪيو: اي منهنجا رب! تنهنجي ٻانهن مان ڪير تنهنجي بارگاہه ۾ سڀ کان وڌيڪ عزت وارو آهي؟ الله پاڪ ارشاد فرمايو: اُهو جيڪو بدلو وٺڻ تي قدرت رکڻ جي باوجود به معاف ڪري ڇڏي.^{(^[2])}

[1]... تفسیر صراط الجنان،پارہ:6، سورۂ نساء، زیرِ آیت:149، جلد:2، صفحہ:341r۔

[2]... شعب الایمان،باب فی حسن الخلق، فصل فی ترک الغضب، جلد:6، صفحہ: 319، حدیث: 8327۔

Important

Mobile Apps

Contact Us