ہر لمحہ اپنے آقا  صَلَّی اللہ عَلَیْہِ وَ آلِہٖ وَ سَلَّم  کی یاد منایا کریں *کپڑے پہننے لگیں تو یاد آنا چاہیے کہ میرے مَحْبُوب  صَلَّی اللہ عَلَیْہِ وَ آلِہٖ وَ سَلَّم  لباس کیسے پہنتے تھے؟ پہلے سیدھی آستین پہنتے، پِھر دوسری آستین پہنتے، پِھر گریبان مبارَک گلے میں ڈالتے *جب سَر پر بالوں کو دیکھیں تو یاد آنا چاہیے کہ میرے آقا  صَلَّی اللہ عَلَیْہِ وَ آلِہٖ وَ سَلَّم  زلفیں رکھتے تھے، مجھے بھی یادِ مصطفےٰ میں زلفیں رکھنی ہیں *جب آئینے میں اپنا چہرہ دیکھیں تو یاد آنا چاہیے کہ میرے مَحْبُوب  صَلَّی اللہ عَلَیْہِ وَ آلِہٖ وَ سَلَّم  کی تو ایک مٹھی داڑھی مبارَک تھی، مجھے بھی یادِ مصطفےٰ میں یہ پیاری سُنّت چہرے پر سجائے رکھنی ہے *جب گھر میں داخِل ہوں تو یاد آنا چاہیے کہ محبوبِ کریم  صَلَّی اللہ عَلَیْہِ وَ آلِہٖ وَ سَلَّم  گھر میں داخِل ہوتے وقت پہلے سیدھا قدم مبارَک اندر رکھتے تھے *جب کھانا کھانے لگیں تو یاد آئے، پیارے مَحْبُوب  صَلَّی اللہ عَلَیْہِ وَ آلِہٖ وَ سَلَّم  بیٹھ کر، سیدھا گھٹنا اُٹھا کر، دوسرے گھٹنے کو بچھا کر کھانا کھایا کرتے تھے، بِسْمِ اللہ پڑھ کر تناوُل فرماتے تھے، یہ سنّتیں  ہمیں بھی یاد ہوں *پیارے مَحْبُوب  صَلَّی اللہ عَلَیْہِ وَ آلِہٖ وَ سَلَّم  چلتے کیسے تھے؟ ہم چلنے لگیں تو یادِ مصطفےٰ دِل میں آئے *مَحْبُوب  صَلَّی اللہ عَلَیْہِ وَ آلِہٖ وَ سَلَّم  بیٹھتے کیسے تھے؟ ہم بیٹھنے لگیں تو یادِ مصطفےٰ  صَلَّی اللہ عَلَیْہِ وَ آلِہٖ وَ سَلَّم  دِل میں آئے *مَحْبُوب  صَلَّی اللہ عَلَیْہِ وَ آلِہٖ وَ سَلَّم  بستر مبارَک پر آرام فرما کیسے ہوتے تھے، جب ہم سونے لگیں تو ہمیں یادِ مصطفےٰ آنی چاہیے۔ یوں جب ہم سنّتیں  سیکھیں گے، ان پر بار بار عَمَل کریں گے تو اِنْ شَآءَ اللہ الْکَرِیْم! یادِ مصطفےٰ دِل میں بسی رہے گی، اِنْ شَآءَ اللہ الْکَرِیْم! عشقِ رسول بڑھتا رہے گا۔

اب طرزِ زندگی تو ذرا سا بدل کے دیکھ      تُو سنتِ رسول کے سانچے میں ڈھل کے دیکھ