تپوس کول سُنَّت دي

خوږو او محترمو اِسلامي وروڼو! د مريض تپوس کول د خوږ آقا و مولا، مکي مَدَني مصطفٰے صَلَّى اللهُ عَلَيْهِ وَاٰلِهٖ وَسَلَّم ډير ښکلي سُنَّت مبارک دي. ^([1]) زمونږ د خوږ نبي، مکي مَدَني صَلَّى اللهُ عَلَيْهِ وَاٰلِهٖ وَسَلَّم دا ډير ښکلے عادت مبارک وو چې رسول الله صَلَّى اللهُ عَلَيْهِ وَاٰلِهٖ وَسَلَّم به کله خبر شو چې فلانکے بيمار دے نو که هغه به د مدينے منورې پۀ اخرۍ غاړه کښې ولې نۀ اوسيدو، نبي کريم صَلَّى اللهُ عَلَيْهِ وَاٰلِهٖ وَسَلَّم به د هغۀ د تپوس د پاره تشريف وړلو.^([2])

د مخلوق د شميرې برابر نيکۍ

خوږو او محترمو اِسلامي وروڼو! د بيمار تپوس کول لکه چې څنګه د الله پاک د اخري نبي، رسولِ هاشمي صَلَّى اللهُ عَلَيْهِ وَاٰلِهٖ وَسَلَّم ښکلي سُنَّت دي، هم داسې د مخکښينو انبيائے کرامو علَيهِمُ السَّلام سُنَّت هم دي، اَلْحَمْدُ لِلّٰہ! د الله پاک ټول نبيان خوا خوږي او غمخواران او د غم زپلو پۀ غم کښې شريکيدونکي وو. پۀ روايت کښې دي: يو ځل الله پاک خپل خوږ نبي حضرت موسیٰ کليمُ الله عَلَیْهِ السَّلَام ته وحي وفرمائيله: اے موسیٰ! آيا تۀ غواړې چې د قيامت پۀ ورځ ستا نيکۍ د ټول مخلوق د نيکو برابر وي؟ حضرت موسیٰ عَلَیْهِ السَّلَام عرض اوکړو: آؤ ! اے الله پاکه...!! بالکل زۀ دا غواړم. الله پاک وفرمائيل: اے موسیٰ! که تۀ دا غواړې نو د مريضانو تپوس کوه! د غريبانانو د پاره د جامو انتظام کوه...!! د روايت الفاظ دي چې د دې نه پس حضرت موسیٰ عَلَیْهِ السَّلَام دا دواړه کارونه پۀ ځان باندې لازم کړل. ^([3])