الَّذِیْنَ یَنْقُضُوْنَ عَهْدَ اللّٰهِ مِنْۢ بَعْدِ مِیْثَاقِهٖ۪-وَ یَقْطَعُوْنَ مَاۤ اَمَرَ اللّٰهُ بِهٖۤ اَنْ یُّوْصَلَ وَ یُفْسِدُوْنَ فِی الْاَرْضِؕ-اُولٰٓىٕكَ هُمُ الْخٰسِرُوْنَ(۲۷) (پارہ:1، سورۀ  بقرہ:27)

صَدَقَ اللہُ الْعَظِیْم وَ صَدَقَ رَسُوْلُہٗ النَّبِیُّ الْکَرِیْم صَلَّى اللهُ عَلَيْهِ وَاٰلِهٖ وَسَلَّم

صَلُّوْا عَلَی الْحَبیب! صَلَّی اللّٰہُ عَلٰی مُحَمَّد

خوږو او محترمو اِسلامي وروڼو! مونږ د وړومبۍ سيپارې د سورۀ بقره د آيت: 27 د اوريدو سعادت حاصل کړو، د دې نه پۀ مخکښنې آيت مبارک کښې وئيلے شوي وو چې د قرآنِ کريم سره، پۀ قرآنِ کريم کښې د بيان کړے شوو مثالونو سره هر څوک هدايت نۀ مومي، ډير خلق د قرآنِ پاک پۀ مثالونو لوستلو اُلټا پۀ ګمراهۍ کښې زيات شي۔ هٰغه کوم خلق دي څوک چې د داسې اوچتې مرتبې د هدايت د کتاب نه هم هدايت نۀ حاصلوي؟ پۀ دې آيت مبارک کښې د داسې بد بخته خلقو درې عيبونه بيانولے کيږي۔

د دې نه وړاندې چې مونږ د آيت مبارک وضاحت واورو مونږ له يوه خبره ياد ساتل پکار ده چې دا درې عيبونه معمولي نۀ دي بلکې داسې خطرناک عيبونه دي کوم چې پۀ چا کښې بياموندے شي: (1): نو پۀ وړومبي نمبر باندې هٰغه بنده د قرآنِ کريم پۀ شان د هدايت د کتاب نه هم هدايت نۀ بيامومي، اُلټا پۀ ګمراهۍ کښې مخکښې لاړ شي او (2): پۀ دويم نمبر باندې داسې کَس د الله پاک د رحمت نه محرومه او سخت نقصان کوونکے هم دے۔  لهذا د قرآنِ کريم پۀ رڼا کښې مونږ له دا درې عيبونه پۀ توجه سره اوريدل پکار دي او ورسره دا پخه اِراده هم کول پکار دي چې مونږ به د دې دريو عيبونو نه هميشه ځان ساتو۔ راځئ چې د قرآنِ کريم د آيت د اوريدو او پۀ هغې باندې د ځان پوهه کولو سعادت حاصل کړو: