د الله پاک پۀ لاره کښې د سفر کولو فضائل

خوږو او محترمو اِسلامي وروڼو! کاش چې مونږ هم خپل دا ذِهن جوړ کړو۔ اَلْحَمْدُ لِلّٰہ! د نومبر مياشت د قافلې مياشت ده۔ پۀ ګڼه شميره کښې به اِسلامي وروڼه د قافلو مسافر جوړيږي۔ تاسو هم نيت اوکړئ! کاروبارونه به روان وي، کارونه هغه دي کوم چې چرې هم نۀ دي ختم شوي او نه به چرته ختم شي۔ دا دُنيا به روانه وي۔ چي مونږ ذِهن جوړ کړو، د قافلې مسافر جوړ شو، د دې پۀ برکت به مو اِنْ شَآءَ اللہُ الْکَرِیم! وران کارونه سم شي۔ * د بُخاري او مسلم روايت دے، رسولِ ذِيشان، مکي مَدَني سلطان صَلَّى اللهُ عَلَيْهِ وَاٰلِهٖ وَسَلَّم فرمائيلي دي: د الله پاک پۀ لاره کښې سحر يا ماښام کول دُنيا او څۀ چې پۀ دُنيا کښې دي د دې نه بهتر دي۔ ^([1]) * د حضرت ابو هريره رَضِىَ اللهُ عَـنْهُ نه روايت دے، رسولِ ذِيشان، مکي مَدَني سلطان صَلَّى اللهُ عَلَيْهِ وَاٰلِهٖ وَسَلَّم فرمائيلي دي: پۀ يو بنده باندې د الله پاک د لارې دوړه او د دوزخ لوګے جمع کيدے نشي۔ ^([2])

د قرآنِ کريم مشهور مفسر، حکيم الاُمّت مفتي احمد يار خان نعيمي رَحْمَةُ اللهِ عَلَيْه د دې حديثِ پاک پۀ شرح کښې فرمائي: د الله پاک د لارې دوړه هٰغه دوړه ده چې د رَبِّ کريم د رضا د پاره پۀ لاره روان شې او هلته دوړه پۀ بدن يا جامو يا ښپو يا پۀ مخ باندې پريوځي۔ د حديثِ پاک معنیٰ دا ده چې لکه څنګه چې دوه مخالف څيزونه نشي جمع کيدے (مثلاً وور او اوبۀ نشي يو ځائے کيدے) هم داسې د الله پاک د لارې دوړه او د دوزخ لوګے پۀ خپل مينځ کښې مخالف جوړ کړے شوي دي۔ دا دواړه پۀ يو ځائے کښې نشي راجمع کيدے۔ ^([3])