جومات د بد بوئي نه بچ کول واجب دي۔^([1])

د اعلیٰ حضرت رَحْمَةُ اللهِ عَلَيْه چې کوم جومات وو، پۀ هغې کښې به لالټين نۀ بلولے کيدو، ډيوه به لګولے کيدله۔ يو ځل داسې وشو چې شپه وه، باران هم وريدو او سيلۍ هم لګيده۔ پۀ داسې حالت کښې ډيوه بليدل مشکل وو، ډيوه به يـې لګوله بيا به مړه کيدله، بيا به يـې لګوله بيا به مړه کيدله۔ پۀ بيا لګولو کښې دا مشکل هم وو چې د ماچس پۀ تيلي کښې هم ګوګړ وي، د دې پۀ بلولو هم د يو څو سيکنډو د پاره بوئي ځي، ځکه ماچس هم پۀ جومات کښې بلول منع وو۔ بيا باران، سيلۍ، پۀ داسې حالت کښې بيا بيا د جومات نه بهر وتل، پۀ ماچس باندې ډيوه بلول، بيا ډير پۀ احتياط سره دننه راوړل ډير مشکل کار وو۔

د اعلیٰ حضرت خادِم حاجي کفايتُ الله صاحب د دې حل څۀ دا راويستو چې لالټين يـې راواخستو او پۀ هغې کښې يـې د خاورو د تيلو پۀ ځائے د اَرنډې تيل (کيسټر آئل Castor Oil) واچول د پاره د دې چې بوئي ترينه نۀ ځي، دا لالټين يـې بَل کړو او پۀ جومات کښې يـې کيښودو۔ پۀ لالټين کښې شيشه لګيدلې وي، ځکه هغه پۀ سيلۍ باندې نۀ مړ کيږي۔

اعلیٰ حضرت رَحْمَةُ اللهِ عَلَيْه چې جومات ته تشريف راوړو او لالټين يـې وليدو نو پۀ جلال کښې يـې وفرمائيل: حاجي صيب! تاسو به ډير ځله دا مسئله اوريدلې وي چې پۀ جومات کښې بد بوداره تيل بلول نۀ دي پکار۔ عرض يـې وکړو: حُضُور! پۀ دې لالټين کښې د اَرنډې  تيل دي۔ اوئې فرمائيل: تيريدونکي خلق به پۀ دې خبره باندې څنګه پوهيږي؟ هغوئي خو به هم دا وائي چې نورو له فتویٰ ورکوي چې پۀ جومات کښې بد بوداره تيل مۀ بلوئ او پخپله يـې لالټين لګولے دے۔^([2])