اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہِ الرَّحْمٰنِ الرَّ حِیْم ^ط

وَعَلٰي اٰلِكَ وَاَصۡحٰبِكَ يَا حَبِيۡبَ اللّٰه                                                                                           اَلصَّلٰوةُ وَالسَّلَامُ عَلَيۡكَ يَا رَسُوۡلَ اللّٰه

وَعَلٰي اٰلِكَ وَاَصۡحٰبِكَ يَا نُوۡرَ اللّٰه                                                                                                          اَلصَّلٰوةُ وَالسَّلَامُ عَلَيۡكَ يَا نَبِيَّ اللّٰه

نَوَيۡتُ سُنَّتَ الۡاِعۡتِكَافِ (ترجمو: مون سنّتِ اعتڪاف جي نيّت ڪئي)

درودِ پاڪ جي  فضيلت

   حضرت محمد بن سَعيد رَحْمَةُ اللهِ عَلَيْه فرمائن ٿا: مون درود پاڪ جو هڪ تعداد مقرر (Fixed) ڪري رکيو هو ۽ روزانو اوتري تعداد ۾ درود شريف پڙهي سمهندو هيس، اَلحَمۡدُلله! درود پاڪ جي برڪت سان هڪ ڏينهن مون تي ڪرم ٿي ويو، مان سُتل هيس ته قسمت جاڳي پئي، پيارا آقا، حبيبِ خُدا                صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  منهنجي خواب ۾ تشريف فرما ٿيا ۽ محبت ڀريي لهجي ۾ فرمايائون: اي منهنجا پيارا اُمَّتي! جنهن وات سان تون مون تي درود پڙهندو آهين، ويجهو ڪر! مان ان وات کي چُمان...!!

   حضرت محمد بن سَعيد رَحْمَةُ اللهِ عَلَيْه فرمائن ٿا: جانِ ڪائنات، فخرِ مَوجُودات صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  جو فرمانِ ذيشان ٻڌي مون کي حيا آئي ته ڪٿي منهنجو وات ۽ ڪٿي حُضُور صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  جا پيارا پيارا، سُهڻا سُهڻا مُبارَڪ چپ...!! اهو سوچي مون حيا وچان پنهنجو چهرو جهڪائي ڇڏيو، پر سراپا حُسْن و جمال، بي بي آمنه جي لال صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  پاڻ منهنجي ڳل کي چميائون...!  حضرت محمد بن سَعيد رَحْمَةُ اللهِ عَلَيْه وڌيڪ فرمائن ٿا: سرڪارِ عالي وقار، مڪي مَدَني تاجدار صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  مون کي هن عنايت سان نوازيو ئي هو ته منهنجي اک کلي وئي، پياري آقا، مڪي مَدَني مصطفيٰ صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  جي خوشبوئن سان (گهر) مَهڪي رهيو هو ۽ منهنجو ڳل ته 8 ڏينهن تائين مهڪندو رهيو.^)[1](