Karbala Jaan Nisar - 4 Muharram 1447 Bayan

Al Quran Books Madani Channel

Magazine Courses Media

دِل کچھ تو پہلے ہی بےچین تھا، امامِ عالی مقام امام حُسَینرَضِیَ اللہ تَعَالٰی عَنْہُ کا خطبہ سُن کر بےچینی اور بڑھ گئی، بیقراری ایسی ہوئی کہ ایک جگہ ٹھہر نہ پائے، یزیدی لشکر کے سپہ سالار عَمر وبن سعد کے پاس پہنچے، کہا: تم امام کے ساتھ جنگ کرو گے تو رسولُ اللہ صَلَّی اللہ عَلَیْہِ وَ آلِہٖ وَ سَلَّم کو کیا جواب دو گے؟ عَمر وبن سعد کے پاس اس سُوال کا کوئی جواب نہیں تھا مگر افسوس! دُنیا کی محبّت جب دِل پر چڑھی ہو تو کوئی نصیحت کام نہیں آتی...!! عَمر وبن سعد پر بھی نصیحت نے اَثَر نہ کیا۔ حضرت حُرْ رَحْمَۃُ اللہ تَعَالٰی عَلَیْہِ یہاں سے مایُوس ہو کر واپس میدان میں آئے٭بدن کانپ رہا ہے٭چہرہ زَرْد ہے٭پریشانی کے آثار صاف نظر آ رہے ہیں٭دِل اتنی زَور سے دھڑک رہا ہے کہ پاس کے سپاہی بھی حیران ہیں۔

ان کے بھائی مُصْعَب بھی ساتھ ہی موجود تھے۔ پوچھا: بھائی...!! تم بہادُر ہو، بہترین جنگجو ہو، تم پہلی بار تو جنگ میں نہیں آئے...!! تم نے بہت سارے بہادُروں کو دُھول چٹائی ہے، پِھر آج کیا مُعَاملہ ہے؟ یہ بےچینی کیسی ہے؟ حضرت حُرْ نے محبّتِ اَہْلِ بیت میں ڈُوب کر، خوفِ خُدا سے لرزتے ہوئے کہا: بات یہ ہے کہ یہ جنگ مصطفےٰ جانِ رحمت صَلَّی اللہ عَلَیْہِ وَ آلِہٖ وَ سَلَّم کے شہزادوں کے ساتھ ہے، کسی دشمن کے ساتھ نہیں بلکہ اپنی ہی آخرت کے ساتھ لڑائی ہے، میں اس وقت جنّت و دوزخ کے درمیان کھڑا ہوں، دُنیا پُوری طاقت کے ساتھ مجھے جہنّم کی طرف کھینچ رہی ہے، اس لئے دِل کانپ رہا ہے۔

ابھی یہ باتیں ہو ہی رہی تھیں کہ ایک بار پِھر امامِ عالی مقام، امام حُسَینرَضِیَ اللہ تَعَالٰی عَنْہُ کی آواز گونجی، فرمایا: کوئی ہے جو آج آلِ رسول پر جان قربان کرے اور رسولِ کائنات صَلَّی اللہ عَلَیْہِ وَ آلِہٖ وَ سَلَّم کے حُضُور کامیابی پائے...!!

Important

Mobile Apps

Contact Us