کروڑوں درود ہوں۔

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد

بیان سننے کی نیتیں

حدیثِ پاک میں ہے:اِنَّمَا الْاَعْمَالُ بِالنِّیَّات اعمال کا دار و مدار نیّتوں پر ہے۔^([1])

اے عاشقان ِ رسول! اچھّی اچھّی نیّتوں سے عمل کا ثواب بڑھ جاتا ہے۔ آئیے! بیان سننے سے پہلے کچھ اچھّی اچھّی نیّتیں کر لیتے ہیں، نیت کیجئے!*رضائے الٰہی کے لیے بیان سُنوں گا*بااَدَب بیٹھوں گا* خوب تَوَجُّہ سے بیان سُنوں گا*جو سُنوں گا، اُسے یاد رکھنے، خُود عمل کرنے اور دوسروں تک پہنچانے کی کوشش کروں گا۔

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد

کعبے کو دیکھنے کی فضیلت

پیارے اسلامی بھائیو! اَلحمدُ لِلّٰہ! حَجّ کے مُقَدَّس مُبارَک اَیّام ہیں، خوش نصیب ہیں جو سَفَرِ حَجّ پر روانہ ہوتے ہیں، کعبہ شریف کی زِیَارت کرتے ہیں، طواف کے مَزے لُوٹتے ہیں، صفا، مَرْوہ کی سعی کرتے ہیں، مُزْدَلِفہ و عرفات میں ٹھہر کر بخشش و مغفرت کے حَقدار بنتے ہیں۔علمائے کرام فرماتے ہیں: *ایک شخص اپنے گھر میں ہے، نفل نمازیں پڑھ رہا ہے *دوسرا شخص حرمِ پاک میں ہے، کعبہ شریف کے قُرْب میں بیٹھا ہے اُسے دیکھ رہا ہے۔ فرمایا: یہ (قُربِ کعبہ میں حاضِر اور کعبہ شریف کے جلووں میں گم شخص) اُس (گھر میں نفل نماز پڑھنے  والے) سے اَفضل ہے۔ ^([2])