د بعضو ويښته ګډ وَډ وو، څرمنې يـې وَچې شوې وي، د بعضو سره د اغوستو د پاره صرف يوه کپړه وه (پۀ هغې باندې يـې خپل سَتر پټ کړے وو)، خوږ آقا و مولا، مکي مَدَني مصطفٰے صَلَّى اللهُ عَلَيْهِ وَاٰلِهٖ وَسَلَّم تشريف راوړلو، د هغوئي سره کښيناستو او اوئې فرمائيل: اَلْحَمْدُ لِلهِ الَّذِيْ جَعَلَ فِيْ اُمَّتِيْ مِنْ اَمْرِيْ اَنْ اَصْبِرَ نَفسِيْ مَعَهُمْ ټول تعريفونه الله پاک لره دي کوم چې زما پۀ اُمت کښې داسې خلق پيدا کړل، د چا سره چې د زړۀ د لګولو  ما ته حکم شوے دے۔ ^([1])

سُبْحٰنَ اللہ! دا دے د خوږ نبي، رسولِ هاشمي صَلَّى اللهُ عَلَيْهِ وَاٰلِهٖ وَسَلَّم مبارک انداز۔۔۔!! نبي کريم صَلَّى اللهُ عَلَيْهِ وَاٰلِهٖ وَسَلَّم به د خواري کښو څومره عزت کولو، د هغوئي سره به کښيناستو، د هغوئي زړونه به يـې ساتل او د هغوئي سره به يـې د مينې اِظهار فرمائيلو۔ مونږ له هم پکار دي چې غريبانان او چې کومه مزدوره طبقه ده، مونږه د هغوئي عزت وکړو، د هغوئي قدر وکړو۔

مزدُور کيدل بده خبره نۀ ده

دا خبره ياد ساتئ چې غريب کيدل، مزدور کيدل، ملازم کيدل بده خبره نۀ ده، پۀ دې باندې شان نۀ کميږي، د حلال رزق د ګټلو د پاره محنت مزدوري کول خو ډيره د فضيلت خبره ده۔ يو ځل خوږ آقا و مولا، مکي مَدَني مصطفٰے صَلَّى اللهُ عَلَيْهِ وَاٰلِهٖ وَسَلَّم تشريف فرما وو، صحابۀ کرام رَضِىَ اللهُ عَـنْهُم هم حاضر وو۔ پۀ دې کښې يو ښکلے او طاقتور ځوان  پۀ تيزو قدمونو اخستو پۀ هٰغه ځائے تير شو، پۀ دې باندې صحابۀ کرامو رَضِىَ اللهُ عَـنْهُم ووئيل: کاش چې دۀ خپله ځواني د الله پاک پۀ لاره کښې لګولې وه۔ رسولِ اکرم، نورِ مُجَسَّم صَلَّى اللهُ عَلَيْهِ وَاٰلِهٖ وَسَلَّم وفرمائيل: * که دا د خپلو نا بالغه ماشومانو د پاره ګټې له راوتلے دے فَہُوَ فِیْ سَبِیْلِ اللہِ نو دا د الله پاک پۀ لاره کښې دے * که د بوډا مور پلار د پاره پۀ رزق لټولو کښې دے   فَہُوَ فِیْ سَبِیْلِ اللہِ نو بيا هم د الله پاک پۀ لاره کښې دے * که ځان د سوال نه د بچ کولو د پاره راوتلے دے فَہُوَ فِیْ سَبِیْلِ اللہِ نو بيا هم د الله پاک پۀ لاره کښې دے۔ ^([2])