د ټولو نه زيات پۀ نقصان کښې څوک۔۔۔؟

تاسو ته پته شته چې د قيامت پۀ ورځ به د ټولو نه زيات پۀ نقصان کښې څوک وي؟ الله پاک پۀ قرآنِ کريم کښې فرمائي:

قُلْ ھَلْ نُنَبِّئُکُمْ  بِالْاَخْسَرِیْنَ اَعْمَالًا (۱۰۳)ؕ اَلَّذِیْنَ ضَلَّ سَعْیُہُمْ فِی الْحَیٰوۃِ  الدُّنْیَا وَ ھُمْ یَحْسَبُوْنَ اَنَّہُمْ یُحْسِنُوْنَ صُنْعًا (۱۰۴)

(پارہ:16 ،سورۂ کہف:103-104)

ترجمهٴ کنزُ العِرفان: تۀ وفرمايه: آيا مونږ تاسو ته وښايُو چې د ټولو نه ناقص عمل کوونکي څوک دي؟ هٰغه خلق چې ټول کوشش يـې د دُنيا پۀ ژوند کښې برباد شو حالانکې هغوئي دا ګُمان لري چې هغوئي ښه کار کوي۔

دا دے هٰغه بد نصيبه کوم چې به د قيامت پۀ ورځ د ټولو نه زيات پۀ نقصان کښې وي، هغۀ څوک دے؟ هٰغه څوک چې پۀ دُنيا کښې نيکۍ کوي، دا ګڼي چې زما پۀ اعمال نامه کښې خو ډيرې نيکۍ جمع شوې دي، زۀ خو د اخرت ډيره تياري کووم خو چې کله هغۀ قبر ته کوز شي، د قيامت پۀ ورځ باندې د الله کريم بارګاه ته ورسي، چې کله هغۀ له پۀ لاس کښې اعمال نامه ورکړے شي، بيا به ورته پته ولګي چې ما چې به کوم کارونه نيکي ګڼله او کول به مې، هغه خو هډو نيکي نۀ وه، هغه خو ټول د ګناه کارونه وو، ما د جنَّت تياري کوله خو کارونه مې ټول هٰغه وکړل کوم چې دوزخ ته بوتلونکي وو۔ دا د ټولو نه زيات پۀ نقصان کښې دے۔

ځکه مونږ له پکار دي چې خپلې سترګې پټولو ته نۀ پريږدو، پۀ دې باره کښې باقاعده د قرآن او د حديث پۀ رڼا کښې، د علمائے کرامو نه پوښتنه وکړو او دِيني معلومات حاصل کړو، مونږ ته معلوميدل پکاري دي چې څۀ زۀ کووم دا واقعي چې نيکي ده، چرته داسې نۀ وي چې هٰغه کار پۀ اصل کښې د ګناه کار وي او مونږه هغه د نيکۍ کار ګڼو او کوو يـې۔