صَلُّوْا عَلَی الْحَبِیْب!                                                   صَلَّی اللہُ  عَلٰی مُحَمّد

فرمانِ مصطفےٰ صَلّی اللہُ عَلَیْہ وآلِہ وسَلَّم:اَفْضَلُ الْعَمَلِ اَلنِّيَّۃُ الصَّادِقَۃُ سچی نیت سب سے افضل عمل ہے۔ ^([1]) اے عاشقانِ رسول! ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے! مثلاً نیت کیجئے! *عِلْم سیکھنے کے لئے پورا بیان سُنوں گا  * با اَدب بیٹھوں گا *دورانِ بیان سُستی سے بچوں گا  *اپنی اِصْلاح کے لئے بیان سُنوں گا  *جو سُنوں گا دوسروں تک پہنچانے  کی کوشش کروں گا۔

صَلُّوْا عَلَی الْحَبِیْب!                                                                                        صَلَّی اللہُ عَلٰی مُحَمد

 پیارا مہینا!

 پیارےاسلامی بھائیو! بارہویں کا پیارا پیارا مہینا جاری و ساری ہے یہ وہ عظیم  مہینا ہے کہ جس میں  رسولِ اکرم،نورِ مجسّم،شاہِ بنی آدم صَلَّی اللہُ  عَلَیْہِ واٰلِہٖ وَسَلَّمَ کی دُنیا میں جلوہ گری ہوئی۔اللہ پاک ہمیں ولادتِ سرکار صَلَّی اللہُ  عَلَیْہِ واٰلِہٖ وَسَلَّمَ کی برکتوں سے مالا مال فرمائے۔

  جب کائنات میں کُفر و شرک اور وَ حشت و بَر بَرِیَّت (ظلم)کا گُھپ اندھیرا چھایا ہوا تھا۔ 12 رَبِیعُ الاوّل کو مکّہ مکرَّمہ میں حضرت آ مِنہ  رَضِیَ اللہُ  عَنْہا  کے مکانِ رَحمت نشان سے ایک ایسا نور چمکا کہ جس نے سارے عالَم کو جگمگ جگمگ کر دیا۔ سِسکتی ہوئی انسانیّت کی آنکھ جن کی طرف لگی ہوئی تھی، وہ تاجدارِ رِسالت، محسنِ انسانیّت صَلَّی اللہُ  عَلَیْہِ واٰلِہٖ وَسَلَّمَ تمام عالَمین کیلئے رَحمت بن کر اِس دنیا میں  جلوہ گر ہو ئے۔

12ربیعُ الاوّل کونورِ خدا صَلَّی اللہُ  عَلَیْہِ واٰلِہٖ وَسَلَّمَ کی دنیا میں جلوہ گَری ہوتے ہی کُفر و ظُلمت کے بادَل چھٹ گئے ، شاہِ ایران” کِسر یٰ “ کے مَحَل پر زلزلہ آیا، چودہ کُنُگرے گِر گئے ۔ اِیران کاجو آتَش کَدہ ایک ہزار سال سے  جل رہا تھا وہ بُجھ گیا ، دریائے ساوَہ خشک ہو گیا ، کعبے کو وَجد آ گیا ۔