کچھ اچھی اچھی نیتیں کر لیجئے! مثلاً نیت کیجئے:*رِضَائے اِلٰہی کے لئےپورا بیان سُنوں گا *عِلْمِ دین سیکھوں گا*ادب سے بیٹھوں گا*نصیحت حاصِل کروں گا *اَحْمَدِ مجتبیٰ، مُحَمَّدِ مصطفےٰ صَلَّی اللہُ عَلَیْہِ وَ آلِہٖ وَسَلَّم کا نامِ پاک سُن کر درودِ پاک پڑھوں گا۔

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد

اَلْوداع اَلْوداع ماہِ رمضان...!!

پیارے اسلامی بھائیو! کچھ ہی دِن پہلے کی بات ہے، عاشقانِ رمضان مُنْتَظِر تھے کہ رَمْضَانُ الْمُبارَک آنے والا ہے۔ رَمْضَانُ الْمُبارَک کی تیاری کی جا رہی تھی مگر... یہ برکت والے دِن تیزی سے گزرتے چلے گئے اور اب ماہِ رمضان تیزی سے اپنے اختتام کی طرف بڑھ رہا ہے۔ آہ! صد آہ! بس چند ہی دِن بعد ماہِ رمضان ہم سے رُخصت ہو جائے گا۔

ہوتے ہو تم ہم سے جدا،اے ماہِ رمضان اَلْوَدَاع!              ملوائے پھر تم سے خدا، اے ماہِ رمضان اَلْوَدَاع!

ماہِ صیام ایسے چلے قالب سے جاں جیسے چلے           ہَیْہَات تم کیسے چلے؟ اے ماہِ رمضان اَلْوَدَاع!

جاتے ہو اے ماہِ نجات! ہم ہاتھ پر ملتے ہیں ہاتھ                  آتی ہے یاد ایک ایک بات، اے ماہِ رمضان اَلْوَدَاع!

جنّت کے تھے سب دَر کھلے، دوزخ کے سب دَر بند تھے                 ہر دم تھی رحمت غیب سے، اے ماہِ رمضان اَلْوَدَاع!

راتوں کو وہ پڑھتے نماز، طَاعت کا وہ دَامن دَراز خالق سے وہ عجز و نِیاز، اے ماہِ رمضان اَلْوَدَاع!

شَہْرُ تَرَاوِیح اَلْوَدَاع، ماہِ تَسَابِیْح اَلْوَدَاع                                  نورِ مَصَابِیْح اَلْوَدَاع، اے ماہِ رمضان اَلْوَدَاع!

اے ماہِ رمضان اَلْسَّلام! اے فرض ِ رحمٰن اَلْسَّلام!          اے شَہر قرآن اَلْسَّلام! اے ماہِ رمضان اَلْوَدَاع!

اے حضرتِ ماہِ صیام! بیدلؔ کا لیجئے سلام                          تسلیم ہے ختمُ الکلام، اے ماہِ رمضان اَلْوَدَاع! ^([1])

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد