یاخُدا ہم عاصیوں پر یہ بڑا اِحْسان ہے                                                  زِندگی میں پھر عطا ہم کو کیا رمضان ہے

اَبْرِ رحمت چھا گیا ہے اور سماں ہے نور نور                                     فَضْلِ رَبّ سے مغفرت کا ہو گیا سامان ہے

ہر گھڑی رَحْمت بھری ہے، ہر طرف ہیں برکتیں                                                                     ماہِ رمضاں رحمتوں اور برکتوں کی کان ہے

یاالٰہی! تُو مدینے میں کبھی رمضاں دکھا                                                       مُدَّتوں سے دِل میں یہ عطّار کے ارمان ہے^([1])

پیارے اسلامی بھائیو! ماہِ رَمَضَان کے فَیضَان کے کیا کہنے! اِس کی تو ہر گھڑی رَحمت بھری ہے۔اِس مہینے میں اَجْر و ثَواب بہت ہی بڑھ جاتاہے۔نَفْل کا ثواب فَرض کے برابر اور فَرْض کا ثواب 70گُنا کر دیا جاتا ہے بلکہ اِس مہینے میں تو روزہ دار کا سونا بھی عبادت میں شُمار کیا جاتاہے۔عَرش اُٹھانے والے فِرِشتے روزہ داروں کی دُعا پر آمین کہتے ہیں۔

عبادت کا دروازہ

روزہ باطِنی عِبادت ہے ،کیوں کہ ہمارے بتائے بِغیر کِسی کو یہ عِلْم نہیں ہوسکتا کہ ہمارا روزہ ہے اور اللہ پاک بَاطِنی عِبادت کو زِیادہ پسند فرماتا ہے ۔ ایک حدیثِ پاک کے مطابِق روزہ عِبادت کا دروازہ ہے۔^([2])

نزول قرآن

رَمضانُ المبارَک کی ایک خُصُوصِیَّت یہ بھی ہے کہ اللہ پاک نے اِس میں قرآن پاک نازِل فرمایاہے ۔ چُنانچِہ مُقدّ س قرآن میں خُدائے رَحمٰن کا فرمانِ عالیشان ہے :

شَهْرُ رَمَضَانَ الَّذِیْۤ اُنْزِلَ فِیْهِ الْقُرْاٰنُ هُدًى لِّلنَّاسِ وَ بَیِّنٰتٍ مِّنَ الْهُدٰى وَ الْفُرْقَانِۚ-فَمَنْ شَهِدَ مِنْكُمُ الشَّهْرَ فَلْیَصُمْهُؕ-وَ مَنْ كَانَ مَرِیْضًا اَوْ عَلٰى سَفَرٍ فَعِدَّةٌ مِّنْ اَیَّامٍ اُخَرَؕ-یُرِیْدُ اللّٰهُ بِكُمُ الْیُسْرَ وَ لَا یُرِیْدُ بِكُمُ الْعُسْرَ٘-وَ لِتُكْمِلُوا الْعِدَّةَ وَ لِتُكَبِّرُوا اللّٰهَ عَلٰى مَا هَدٰىكُمْ وَ لَعَلَّكُمْ تَشْكُرُوْنَ(۱۸۵) (پارہ:2، البقرۃ185)