آه! پته نه لګي چې د الله پاک د رحمت حق دار به جوړيږو او په ښه حالت کښې به د قبر نه راپاڅولے شو يا مجرمان جوړ شوي به راپاڅولے شو، مونږ ته پته نشته...!! الله دې نه کړي، الله دې نه کړي که مونږ مجرمان راپاڅولے شو نو يقين اوکړئ! د سختې پريشانئ سره به مخ شو.

دا فيصله به هم نن کول وي

اے عاشقانِ رَسُول! کله چې به مړي راژوندي شي او د قبرونو نه به راپاڅي، هغه وخت له مونږ د ځان د پاره څه خوښوو؟ مونږ څه غواړو چې مونږ کله د قبر نه راپاڅو نو په کوم حال کښې راپاڅو، [آيا دا خوښوو چې] زما عمل ما له زيرے راکړي يا آيا دا خوښوو چې زما اعمال ما مايوسه کړي يعنې زما عمل زما د پاره سورلئ جوړه شي يا سخته بدبوداره شکل کښې زما په اُوګو سور شي؟ ما د دوزخ په لور راښکاږي يا ما له د جنت زيرے راکړي؟ مونږه څه غواړو؟ د دې فيصله مونږ له هم نن کول دي. مونږ چې په کوم حالت کښې د قبر نه راپاڅيدل غواړو، نن، په دې دنيا کښې به مونږ له هم هغسې عمل کول وي، که مونږ نيک عمل اوکړو نو په ځنکدن کښې، قبر کښې، حشر کښې، د قبر نه د راپاڅيدو په وخت، په پلِ صراط باندې به زمونږه [نيک عمل] زمونږه ملګرے او غم خور وي، زمونږه ملاتړ به جوړيږي او که نن مونږ بد عمل اوکړو، ګناهونه اوکړو، په تنهائيئ کښې مو په بے باکئ سره ګناهونه اوکړل، که دا خبره مو هيره کړه چې الله پاک ويني نو کله چې د قبر نه راپاڅو هغه وخت د سختې پښيمانتيا او شرم سره مخ کيدے شو. ځکه مونږ څه غواړو؟ مونږه د قبر نه څنګه راپاڅيدل خوښوو؟ د دې فيصله به مونږ له هم نن کول وي.