اَلْحَمْدُ لِلہِ رَبِّ الْعٰلَمِیْنَ وَالصَّلٰوۃُ وَالسَّلَامُ عَلٰی خَاتَمِ النَّبِیّٖن

اَمَّا بَعْدُ! فَاَعُوْذُ بِاللہِ مِنَ الشَّیْطٰنِ الرَّجِیْمِ بِسْمِ اللہِ الرَّحْمٰنِ الرَّحِیْمِ

اَلصَّلٰوۃُ وَالسَّلَامُ عَلَیْکَ یَارَسُوْلَ اللہ                                                        وَعَلٰی آلِکَ وَاَصْحٰبِکَ یَاحَبِیْبَ اللہ

اَلصَّلٰوۃُ وَالسَّلَامُ عَلَیْکَ یَانَبِیَّ اللہ                                                                      وَعَلٰی آلِکَ وَاَصْحٰبِکَ یَانُوْرَ اللہ

نَوَیْتُ سُنَّتَ الْاِعْتِکَاف                                                                                                                (ترجمہ: میں نے سُنَّت اعتکاف کی نِیَّت کی)

درودِ پاک کی فضیلت

ایک مرتبہ صحابۂ کرام علیہمُ الرّضوان نے بارگاہِ رسالت میں عرض کیا: یارسولَ اللہ صلی اللہُ عَلَیْہِ وَ آلِہٖ وَسَلَّم!اللہ پاک کا فرمان ہے:

اِنَّ اللّٰهَ وَ مَلٰٓىٕكَتَهٗ یُصَلُّوْنَ عَلَى النَّبِیِّؕ-  (پارہ:22، الاحزاب:56)

ترجمہ کنزُ العِرفان:بیشک اللہ اور اس کے فرشتے نبی پر درود بھیجتے ہیں۔

اس فرمانِ عالی شان کا کیا مطلب ہے؟ غیب کا عِلْم رکھنے والے نبی، مکی مَدَنی ، مُحَمَّدِ عربی صلی اللہُ عَلَیْہِ وَ آلِہٖ وَسَلَّم نے فرمایا: اِنَّ ہٰذَا لَمِنَ الْمَکْتُوْمِ یہ ایک پوشیدہ عِلْم ہے، اگر تم نہ پوچھتے تو میں نہ بتاتا۔ پِھر آپ صلی اللہُ عَلَیْہِ وَ آلِہٖ وَسَلَّم نے آیت کا مطلب بتاتے ہوئے فرمایا: اِنَّ اللہَ عَزَّ وَ جَلَّ وَکَّلَ بِی مَلَکَیْنِ بےشک اللہ پاک نے میرے لئے 2 فرشتے مُقَرَّر فرما دئیے ہیں، لَا اُذْکَرُ عِنْدَ عَبْدٍ مُّسْلِمٍ فَیُصَلِّیْ عَلَیَّ جب بھی کسی مسلمان کے پاس میرا ذِکْر ہو اور وہ مجھ پر درود پڑھے تو وہ فرشتے کہتے ہیں: غَفَرَ اللہُ لَکَ اللہ پاک تمہاری بخشش فرمائے۔ ان فرشتوں کی دُعا کے جواب میں اللہ پاک اور اس کے فرشتے آمین کہتے ہیں۔^([1])

بحکمِ حق اُترتے ہیں فرشتے خاص رحمت کے کیا کرتے ہیں جب اَہْلِ سُنَن  چرچا  مُحَمَّد کا