يقين اوكړئ! په ډير په نقصان كښې دے هغه بنده د چا نه چې شفاعت كوونكے آقا مكي مدني مصطفٰى صَلَّى اللهُ عَلَيْهِ وَاٰلِهٖ وَسَلَّم د تعلق ختمولو اظهار اوفرمائي. د هغه دُنيا هم برباده ده او آخرت ئې هم برباد دے، په دې وجه په مونږه باندې لازم دي چې د خپل ژوند يو ساعت، هره ورځ، هر منټ، هره ګهنټه د الله او رسول صَلَّى اللهُ عَلَيْهِ وَاٰلِهٖ وَسَلَّم راضي كوونكي كارونو كښې تير كړو او هر هغه كار د كوم نه چې زمونږ خوږ آقا مكي مدني مصطفٰى صَلَّى اللهُ عَلَيْهِ وَاٰلِهٖ وَسَلَّم د بيزارئ اظهار كړے دے د هغې نه پوره پوره د بچ كيدو كوشش اوكړو.

هغه زمـونږ نه نه دے

     په ډيرو احاديثو كښې دغه شان ارشادات دي چې كوم بنده فلانے كار اوكړي يا فلانے كار اونكړي لَیْس مِنَّا هغه زمونږ نه نه دے. يعني هغه زمونږ په طريقه باندې نه دے. زمونږ د خوښو [خلقو] نه نه دے يا مونږه د هغه نه بيزاره يو. راځئ!  د دې مضمون يو څو حديثونه اورو او نِيَّت كوو چې د داسې كارونو نه به بچ كيږو او د الله پاك او رسول صَلَّى اللهُ عَلَيْهِ وَاٰلِهٖ وَسَلَّم راضي كولو پوره پوره كوشش به كوو. 

(1) په خوش اِلحانئ سره قرآن نه لوستل

       زمونږه خوږ آقا، مكي مدني مصطفٰى صَلَّى اللهُ عَلَيْهِ وَاٰلِهٖ وَسَلَّم فرمائي:
 لَیْسَ مِنَّا مَنْ لَمْ یَتَغَنَّ بِالْقُرْآنِ يعني څوك چې په خوش اِلحانئ سره قرآن اونه لولي ، هغه زمونږ نه نه دے.^[1]