ہے یہ نسخۂ نایاب دِل کے لئے           جو پڑھے دِل لگا کر ، سمجھ کر اسے

پیرِ کامِل ملے ، بند رَسْتہ کھلے                گنج بخشی ہے اس کی یہ ظاہِر ظہور

صَلُّوْا عَلَی الْحَبِیْبِ !                                                                   صَلَّی اللہ عَلٰی مُحَمَّد

کشف المحجوب کے ایک باب کا خُلاصہ

اے عاشقانِ رسول !   کَشْفُ الْمَحْجُوب شریف کا ایک باب ہے : کَشْفِ حِجَاب : آداب کا بیان۔ اس باب میں حُضُور داتا گنج بخش علی ہجویری رحمۃ اللہ عَلَیْہ  نے بنیادی طَور پر 3 چیزیں ذِکْر فرمائی ہیں : ( 1 ) : اَدَب کسے کہتے ہیں ؟   ( 2 ) : اَدَب کی اَقْسَام  ( 3 ) : اور مختلف آدابِ زِندگی۔

آئیے !  کَشْفُ الْمَحْجُوب شریف کے اس باب سے داتا حُضُور رحمۃ اللہ عَلَیْہ  کی تعلیمات اور چند نصیحتیں سُننے کی سَعَادت حاصِل  کرتے ہیں ، اللہ پاک ہمیں اَوْلیائے کرام کی محبّت اور ان کی تعلیمات پر عمل کی توفیق نصیب فرمائے۔اٰمِیْن بِجَاہِ خَاتَمِ النَّبِیّٖن  صَلَّی اللہ عَلَیْہ وَآلِہٖ وَسَلَّم ۔

 ( 1 ) : اَدَب کی اہمیّت

حُضُور داتا گنج بخش علی ہجویری رحمۃ اللہ عَلَیْہ  فرماتے ہیں : تمام دِینی اور دُنیوی کاموں کا حُسْن اَدَب میں ہے ، ہر شخص کے لئے اُس کے مقام کے مطابق علیحدہ آداب ہیں ، مُرَوَّت ، سُنّت اور عزّت کی حفاظت ادب ہی کے ذریعے ہوتی ہے۔ ^{( [1] )} اللہ پاک قرآنِ کریم میں فرماتا ہے :

یٰۤاَیُّهَا الَّذِیْنَ اٰمَنُوْا قُوْۤا اَنْفُسَكُمْ وَ اَهْلِیْكُمْ نَارًا وَّ قُوْدُهَا النَّاسُ وَ الْحِجَارَةُ   ( پارہ : 28 ، سورۂ تحریم : 6 )

ترجَمہ کنزُ الایمان : اے ایمان والو اپنی جانوں اور اپنے گھر والوں کو اس آ گ سے بچاؤ جس کے ایندھن آدمی اور پتھر ہیں۔