پیارے پیارے اسلامی  بھائیو !  آئیے !  اَمِیْرُ الْمُؤمِنِیْنحضرت  عُثمانِ غنی ذُو النُّورَین رَضِیَ اللہ عَنْہ  کی سیرتِ مبارکہ کی چند جھلکیاں سُنتے ہیں:

آپ رَضِیَ اللہ عَنْہ  کا نام ” عثمان “ کُنیت ” ابوعَمْرو “ اور القابات ” جامِعُ القرآن “ اور  ” ذُوالنّورین  “ ہیں *  رَضِیَ اللہ عَنْہ  خُلَفائے راشِدین میں تیسرے خلیفہ ہیں  * سرکارِدوعالم ، نورِ مجسّم صَلَّی اللہ عَلَیْہِ واٰلہٖ وَسَلَّمَ کی 2شہزادیاں آپ رَضِیَ اللہ عَنْہ کے نکاح میں یکے بعددِیگرے  آئیں * رَضِیَ اللہ عَنْہ  شکل و صورت میں حضرتِ  ابراہیم عَلَیْہِ الصَّلٰوۃُ وَالسَّلَام اورسرکارِ مدینہ صَلَّی اللہ عَلَیْہِ واٰلہٖ وَسَلَّمَ سے بہت مشابہ تھے * آپ رَضِیَ اللہ عَنْہ  کی شان میں آیاتِ قرآنی نازل ہوئیں  * آپ رَضِیَ اللہ عَنْہ  سے فِرشتے بھی حیا کرتے تھے * راہِ خدا میں 2مرتبہ ہجرت فرمائی *   بہت بڑے تاجر اوربے حد سخی تھے * نبیِ رحمت ، مالکِ جنّت صَلَّی اللہ عَلَیْہِ واٰلہٖ وَسَلَّمَ نے آپ رَضِیَ اللہ عَنْہ  کو جنّت کی خوشخبری سُنائی  * آپ رَضِیَ اللہ عَنْہ نے82سال کی عمر پائی۔ *  بڑی ہی مظلومیت کے ساتھ ، روزے کی حالت میں تلاوتِ قرآن کرتے ہوئےجامِ شہادت نوش فرمایا۔

صَلُّوْا عَلَی الْحَبِیْب !                              صَلَّی اللہ عَلٰی مُحَمَّد

مَدَنی آقا صَلَّی اللہ عَلَیْہِ واٰلہٖ وَسَلَّمَ کی شرم و حیا

پیارے پیارے اسلامی بھائیو !  غور  کیجئے جب آقا صَلَّی اللہ عَلَیْہِ واٰلہٖ وَسَلَّمَ کے ایک صحابی کی شرم و حیا کا یہ عالم ہے تو خود شرم و حیا کے پیکر صَلَّی اللہ عَلَیْہِ واٰلہٖ وَسَلَّمَ کی حیا کا عالم کیا ہوگا  ، چنانچہ

مَدَنی آقا صَلَّی اللہ عَلَیْہِ واٰلہٖ وَسَلَّمَ کی شرم  و حَیا کے مُتَعَلِّق مشہور صحابیِ رسول حضرت  ابُو سعید خدری رَضِیَ اللہ عَنْہ فرماتے ہیں:نبیِ اکرم صَلَّی اللہ عَلَیْہِ واٰلہٖ وَسَلَّمَ اس سے بھی زیادہ شرمیلے تھے جیسی کنواری لڑکی اپنے پردے میں شرمیلی ہوتی ہے۔ ( مشکاۃ ، کتاب احوال القیامۃ…الخ ،  ۲ / ۳۶۵ ،  حدیث:۵۸۱۳ )