Shoq e Hajj

حضرت ابو موسیٰ اشعری رَضِیَ اللہُ عنہ روایت کرتے ہیں : اللہ پاک کے رسول ، رسولِ مقبول صلی اللہُ عَلَیْہِ وَ آلِہٖ وَسَلَّم نے ارشاد فرمایا : حاجی اپنے اہل خانہ میں سے 4 سو افراد کی شفاعت کرے گا اور حاجی گناہوں سے ایسے نکل جاتا ہے جیسے اس کی ماں نے اسے جنا تھا۔⁽[1]⁾

حاجی کے لئے بخشش کی بشارت

حضرت ابو ذَرغِفاری رَضِیَ اللہُ عنہ سے روایت ہے ، رسولِ رحمت ، شفیعِ اُمَّت صلی اللہُ عَلَیْہِ وَ آلِہٖ وَسَلَّم نے فرمایا : اللہ پاک کے نبی حضرت داؤدعَلَیْہ السَّلَام نے اللہ پاک کی بارگاہ میں عرض کیا : یا اللہ پاک!جو تیرے بیت (یعنی کعبہ شریف) کی زیارت کے لئےآئیں ، ان بندوں کے لئےکیا اجر ہے؟اللہ پاک نے فرمایا : اے داؤد! بے شک جو میرے کعبہ کا حج کریں ، میرے ذِمۂ کرم پر ہے کہ میں ان کو دنیا میں معاف کر دوں اور (قیامت کے دِن ) جب وہ مجھ سے ملیں تو میں ان کی بخشش فرما دوں ۔⁽[2]⁾

اللہ کے رسول ، رسول ِمقبول صلی اللہُ عَلَیْہِ وَ آلِہٖ وَسَلَّم نے فرمایا : جب عرفہ کا دن ہوتا ہے ، اللہ پاک فرشتوں کے سامنے فخر فرماتا ہے ، ارشاد ہوتاہے : اے فرشتو! میرے بندوں کو دیکھو!وہ پرا گندا حال ، بکھرے بالوں کے ساتھ دُور دُور سے آئے ہیں ، میں تمہیں گواہ بناتا ہوں بے شک میں نے ان کو بخش دیا۔فرشتے عَرْض کرتے ہیں : اے اللہ پاک! اِن میں گناہ گار بھی ہیں تو اللہ پاک فرماتا ہے : بے شک میں نے اُن کو بھی بخش دیا۔⁽[3]⁾

[1]...مسند بزار، جلد : 8، صفحہ : 170، حدیث : 3196۔

[2]...معجم اوسط، جلد : 4، صفحہ : 297، حدیث : 6037۔

[3]...کنز العمال، کتاب الحج، جُز : 5، جلد : 3، صفحہ : 29، حدیث : 12098۔

Important

Mobile Apps

Contact Us