د مسلمان په عِزَّت او تعظيم كښې دي چې په هيڅ شان سره په هغه پورې توقې اونكړے شي، د آيتِ كريمه په دې حِصَّه كښې د دې خبرے تعظيم وركړے شوے دے چې يو نارينه دې بل نارينه پورې او يوه ښځه دې په بلې ښځې پورې ټوقې اونكړي.

      د هر يو خپل شوق وي، د ژوند تيرولو ئې خپل انداز وي، مونږه د چا په انداز باندې تنقيد نه شو كولے، مونږه د چا په جامو او  د چا په لائف سټائل [يعني ژوند تيرولو انداز] باندې تنقيد نه شو كولے، تر دې پورې كه يو كس ګنهګار دے نو هغه ته دې په ښه ښكلي انداز د نيكئ دعوت وركړے شي خو په هغه پورې ټوقې كول هيڅ كله ټيك خبره نه ده.

       نن سبا زمونږ په مُعاشره كښې دا وبا ډيره عامه ده  *که چا ګيره مباركه پريښوده نو په هغه باندې تنقيد * که څوك عمامه شريفه په سر كړي نو تنقيد * که څوك د نيمو پنډو پورې د سُنَّت مطابق لباس اغوندي نو په هغه باندې تنقيد * د بے وسه غريب په جامو پورې ټوقې كوي * د نورو پيښې کوي او د هغوئي په انداز پورې ټوقې کوي * تر دې پورې چې بعضې نادانه د قُدرت جوړ کړے شوو څيزونو پورې ټوقې کوي او بالکل نه شرميږي * د چا سترګه كږه ده نو هغه ته كوږ سترګے وائي او ور پورې خاندې * د چا پوزه اوږده ده نو د هغه په پوزه پورې ټوقې كوي