شبِ براءَت جا 6 نفل

مغرب جي فرض ۽ سنّت وغيره کان پوءِ ڇهه رڪعتون خصوصي نفل ادا ڪرڻ اولياءِ ڪرام رَحِمَهُمُ الـلّٰـهُ  جي معمولات مان آهن، مغرب جو فرض ۽ سنّتون وغيره ادا ڪري ڇهه رڪعتون نفل ٻه ٻه ڪري ادا ڪريو. پهرين ٻـن رڪعتن کان پهريان هي نيت ڪريو تـه ” يا الله پاڪ!  هنن 2 رڪعتن جي بَرَڪت سان مونکي عمر درازي بالخير (يعني عمر ۾ برڪت) عطا فرماءِ.“ ٻين ٻن رڪعتن جي شروع ڪرڻ کان پهريان هين نيت ڪريو ” ياالله پاڪ! هنن ٻن رڪعتن جي بَرَڪت سان مصيبتن کان منهنجي حفاظت فرماءِ.“ ۽ ٽين ٻن رڪعتن جي شروع ڪرڻ کان پهريان هن طرح نيّت ڪريو،” ياالله پاڪ! هنن ٻن رڪعتن جي برڪت سان مون کي پاڻ کان سواءِ ڪنهن جو محتاج نه ڪر“

هنن ڇھ رڪعتن ۾ سوره الفاتحہ کان بعد جيڪو چاهيو پڙهي سگهو ٿا، چاهيو ته هر رڪعت ۾ سورة الفاتحہ کان بعد 3 ڀيرا  سورة الاخلاص پڙهو. هر ٻن رڪعتن کان پوءِ ايڪيهه ڀيرا قُلْ هُوَ الله (پوري سورت) يا هڪ ڀيرو سورهءِ يٰسين شريف پڙهو بلڪه  ٿي سگهي ته ٻئي پڙهي ڇڏيو. هي به ٿي سگهي ٿو ته ڪو اسلامي ڀاءُ يٰسين شريف وڏي آواز سان پڙهي ۽ ٻيا خاموشيءَ سان ٻُڌن، هن ۾ اهو خيال رهي ته هن دوران زبان سان يٰسين شريف بلڪه ڪجھ نه پڙهي. ۽ هيءُ مسئلو ياد رکو ته جڏهن قرآنِ ڪريم وڏي آواز سان پڙهيو وڃي ته جيڪي ماڻهو ٻڌڻ جي لاءِ حاضر آهن انهن تي فرضِ عين آهي ته خاموشي سان ٻڌن.

 ان شاءالله رات شروع ٿيندي ئي ثواب جا ڍير لڳي ويندا. هر ڀيري يٰسين شريف کان پوءِ دعاءِ نصفِ شعبان به پڙهو:

شيخِ طريقت، اميراهلسنت جو شعبان المعظم جي فضائل تي مشتمل رسالو آهي:”آقا(صَلَّى اللّٰهُ عَلَيۡهِ واٰلِهٖ وَسَلَّمَ) جو مهينو“ هن رسالي ۾ دعاءِ نصف شعبان لکي آهي، اتان ڏسي پڙهي وڃي.