د هدايت په مُعامَله كښې د خلقو درې قسمونه

     خوږو او محترمو اسلامي ورونړو! معلومه شوه چې د حُضُورِ اكرَم صَلَّى اللهُ عَلَيْهِ وَاٰلِهٖ وَسَلَّم دُعاګانې د الله پاك  په بارګاه كښې قبليږي، اوګورئ! خوږ آقا صَلَّى اللهُ عَلَيْهِ وَاٰلِهٖ وَسَلَّم د حضرت امير مُعاويه رَضِیَ اللهُ عَنْهُ په حق كښې څومره ښائسته دُعا كړې ده: اَللّٰہُمَّ اجْعَلْہُ ھَادِیًا مَہْدِیاً ^[1] اے الله پاكه! مُعاوِيه هادِي او مَهدي جوړ كړې (يعني دا پخپله هم هدايت يافته جوړ کړې او نورو ته ئې هدايت وركوونکے هُم جوړ کړې).

      عُلمائے كرام فرمائي: د خلقو درې قسمونه دي: (1) څه خلق داسې دي چې پخپله په هدايت دي خو نورو ته هدايت نه وركوي، څومره داسې پټ ځان ساتونكي بندګان دي چې هغوئي ځان د خلقو نه لرې كړے دے، په غارونو كښې عبادت كوي، دا پخپله په هدايت دي خو نورو ته هدايت نه وركوي (2) څه خلق داسې دي چې نورو ته هدايت وركوي، د نيكئ دعوت وركوي، بيان كوي، درس كوي، ښې ښې خبرې كوي خو پخپله په هدايت نه وي او ګناه كوي (3) دريم قِسم خلق هغه دي چې پخپله هُم په هدايت دي او نورو ته هم هدايت وركوي. دا د ټولو نه افضل دي، خوږ آقا مكي مَدَني مصطفٰى صَلَّى اللهُ عَلَيْهِ وَاٰلِهٖ وَسَلَّم د حضرت اَمِيرِ مُعاويه رَضِیَ اللهُ عَنْهُ د پاره دا دُعا كړې وه چې يا الله پاكه! مُعاويه د ټولو نه په افضله درجه كښې اوساتې! دوئي پخپله هدايت موندونكے او نورو ته هم هدايت وركوونكے جوړ كړې.^[2]