د الله والؤ يو پاك عادت

     خوږو او محترمو اسلامي ورونړو! تاسو اوليدل! زمونږه بُزُرګانِ دينو به په نيكو اعمالو كښې اخلاص څومره زيات لرلو! هغه پاكو خلقو به د خپلو نيكو پټولو څومره جذبه لرله...! خو زمونږه حال دا دے چې که زمونږه نيكئ ښكاره شي، خلق مو تعريف اوكړي، واه واه اوکړي، په ډك محفل كښې اعلان اوشي چې فلانكي صاحب دومره مال د الله پاك په لاره كښې صَدَقه كړے دے، په سوشل ميډيا باندې اوچليږي، په اخبارونو كښې اشتِهار اولګي نو مونږه دومره خوشحاليږو چې د خوشحالئ نه په جامو كښې نه ځائيږو خو قربان شم! د هغه نيكو او پرهيزګارو خلقو د سوچ، د هغوئي د هِمَّت او اِخلاص نه، هغوئي به خالِص د الله پاك د رِضا د پاره نيكئ كولې، اوَّل خو به ئې نيكئ ظاهرولې نه، بيا د هغوئي د پټ ساتلو د هر قِسمه كوشش باوجود به که په څه وجه د هغوئي نيكئ ښكاره شوے نو هغوئي به ډير خفه كيدل چې زمونږه نيكئ ولے ښكاره شوے، مونږه خو د الله پاك رِضا غواړو، چرته د خلقو دا تعريفونه، واه واه کول او زمونږه دا نيك نامي زمونږ د نيكئ بدله جوړه نه شي.

    دا دے د الله والؤ شان دے....! الله پاك دِ د دغه نيكانو بندګانو په بركت مونږ ګنهګارانو ته هم د اِخلاص دولت راعطا كړي. اٰمِین بِجَاہِ خَاتَمِ النَّبِیِّيْن صَلَّى اللهُ عَلَيْهِ وَاٰلِهٖ وَسَلَّم