Book Name:27 Nimazun Ka Sawab
حدیثِ پاک میں ہے : اَلنِّیَّۃُ الْحَسَنَۃُ تُدْخِلُ صَاحِبَہَا الْجَنّۃَ اچھی نیت بندے کو جنت میں داخِل کروا دیتی ہے۔ ([1])
اے عاشقانِ رسول! اچھی نیتوں سے عمل کا ثواب بڑھ جاتا ہے۔ آئیے! بیان سننے سے پہلے کچھ اچھی اچھی نیتیں کر لیتے ہیں ، مثلاً نیت کیجئے! *رضائے الٰہی کے لئے بیان سُنوں گا *بااَدَب بیٹھوں گا * خوب توجہ سے بیان سُنوں گا * بیان سُن کر اس پر عمل کی کوشش کروں گا * بیان کا جتنا حصہ یادرہا ، دوسروں تک پہنچا کر عِلْم دین پھیلانے کا ثواب کماؤں گا۔
صَلُّوْا عَلَی الْحَبیب! صَلَّی اللّٰہُ عَلٰی مُحَمَّد
پیارے اسلامی بھائیو! آج کے بیان کا موضوع ہے : “ 27 نمازوں کا ثواب “ یعنی آج کے بیان میں ہم اِنْ شَآءَ اللہُ الْکَرِیم! نمازِ باجماعت کے فضائل و برکات سننے کی سَعَادت حاصِل کریں گےلیکن چونکہ ماہِ ذِیْقَعْدَۃُ الْحَرام جارِی ہے اور اس ماہِ مبارک کی 2 تاریخ کو دُنیائے عِلْم کی ایک عظیم ہستی ، صَدْرُ الشَّرِیْعہ ، بَدْرُ الطَّرِیقہ ، حضرت عَلَّامہ ، مولانا ، مفتی محمد امجد علی اعظمی رَحمۃُ اللہِ عَلَیْہ کا عُرْسِ پاک منایا جاتا ہے ، لہٰذا صَدْرُ الشَّرِیْعہ رَحمۃُ اللہِ عَلَیْہ کا فیضان حاصِل کرنے کے لئے ابتداءً ہم صَدْرُ الشَّرِیْعہ رَحمۃُ اللہِ عَلَیْہ کا ذِکْرِ پاک بھی سننے کی سَعَادت حاصِل کریں گے۔ اللہ پاک ہمیں صَدْرُ الشَّرِیْعہ ، بَدْرُ الطّرِیقہ ، مولانا ، مفتی محمد امجد علی اعظمی رَحمۃُ اللہِ عَلَیْہ کا فیضان نصیب فرمائے۔ اٰمِیْن بِجَاہِ النَّبِیِّ الْاَمِیْن صَلَّی اللہُ عَلَیْہِ وَاٰلِہٖ وَسَلَّم۔
یہ ساری برکتیں ہیں خدمتِ دینِ پیمبر کی جہاں میں ہر طرف ہے تذکرہ صدرِ شریعت کا
صَلُّوْا عَلَی الْحَبیب! صَلَّی اللّٰہُ عَلٰی مُحَمَّد