جبريلِ امين عَلَيۡهِ السَّلَام بارگاههِ مصطفٰي ۾

حضرت عمر بن خطاب رَضِىَ اللهُ عَنْه کان روايت آهي، فرمائن ٿا ته هڪ ڏينهن اسان نبي ڪريم، رؤف رحيم صَلَّى اللّٰهُ عَلَيۡهِ واٰلِهٖ وَسَلَّمَ وٽ ويٺا هئاسين ته اوچتو بلڪل سفيد لباس ۽ نهايت ڪارن وارن وارو هڪ شخص آيو، اهو نه ڪوئي مسافر لڳي رهيو هو ۽ نه ئي اسان مان ڪو ان کي سڃاڻندو هو۔ هو پاڻ صَلَّى اللّٰهُ عَلَيۡهِ واٰلِهٖ وَسَلَّمَ وٽ اچي ويهي رهيو ۽ ان پنهنجا گوڏا رسولِ رحمت، شفيعِ امت صَلَّى اللّٰهُ عَلَيۡهِ واٰلِهٖ وَسَلَّمَ جي مبارڪ گوڏن سان ملائي ڇڏيا ۽ پنهنجا هٿ گوڏن تي رکي ڇڏيا ۽ چوڻ لڳا: اي محمد!(صَلَّى اللّٰهُ عَلَيۡهِ واٰلِهٖ وَسَلَّمَ) مون کي اسلام جي باري ۾ ٻڌايو؟ پياري آقا، مديني واري مُصطفٰي صَلَّى اللّٰهُ عَلَيۡهِ واٰلِهٖ وَسَلَّمَ جن ارشاد فرمايو: اِسلام اهو آهي ته تون هن ڳالھ جي شاهدي ڏئين ته الله پاڪ کان سواءِ ڪوبه عبادت جي لائق ناهي ۽ محمد صَلَّى اللّٰهُ عَلَيۡهِ واٰلِهٖ وَسَلَّمَ الله جا رسول آهن، ۽ تون نماز قائم ڪرين، زڪوة ڏئين، رمضان جا روزا رکين ۽ طاقت هجي ته ڪعبةالله جو حج ڪرين۔ ان چيو: اوهان سچ فرمايو۔ اسان کي هن تي تعجب ٿيو ته پاڻ ئي سوال ڪري ٿو ۽ پوءِ پاڻ ئي تصديق به ڪري ٿو۔ پوءِ ان چيو: مون کي ايمان جي باري ۾ ٻڌايو؟ نور جي پيڪر، تمام نبين جي سَروَر صَلَّى اللّٰهُ عَلَيۡهِ واٰلِهٖ وَسَلَّمَ جن ارشاد فرمايو: ايمان اهو آهي ته تون الله پاڪ، ان جي ملائڪن، ان جي ڪتابن، ان جي رسولن، آخرت ۽ تقدير جي چڱي ۽ بُري هئڻ تي ايمان آڻين۔ ان چيو: اوهان سچ فرمايو۔ وري ان چيو: مون کي احسان جي باري ۾ ٻڌايو؟ اُمّت تي مهربان، ٻنهي جھانن جي سلطان صَلَّى اللّٰهُ عَلَيۡهِ واٰلِهٖ وَسَلَّمَ جن ارشاد فرمايو: تون الله پاڪ جي عبادت اهڙي طرح ڪر جو ڄڻ تون ان کي ڏسي رهيو آهين، جيڪڏهن تون ان کي نٿو ڏسي سگھين ته هُو ته توکي ڏسي رهيو آهي۔ پوءِ ان عرض ڪيو: مون کي قيامت جي باري ۾ ٻڌايو؟ فرمايائون: جنهن کان قيامت جي باري ۾ پڇيو ويو آهي اهو پڇڻ واري کان وڌيڪ نٿو ڄاڻي۔ عرض ڪيائين: قيامت جون نشانيون ئي ٻڌائي ڇڏيو۔ فرمايائون: ٻانِهي پنهنجي مالڪ کي ڄڻيندي ۽ توهان ڏسندؤ ته اگھاڙن پيرن وارا، اگھاڙي جسم، مفلس ۽ ٻڪريون چارڻ وارا بلند و بالا گھرن جي تعميرات ۾ هڪٻئي تي فخر ڪندا هوندا۔ پوءِ اهو شخص هليو ويو، (حضرت عمر بن خطاب رَضِىَ اللهُ عَنْه فرمائن ٿا) مان ڪجھ دير خاموش رهيس، پوءِ پاڻ سڳورن صَلَّى اللّٰهُ عَلَيۡهِ واٰلِهٖ وَسَلَّمَ فرمايو: اي عمر! خبر اٿئي اهو سوال ڪندڙ ڪير هو؟ مون چيو: الله پاڪ ۽ ان جو رسول صَلَّى اللّٰهُ عَلَيۡهِ واٰلِهٖ وَسَلَّمَ بهتر ڄاڻن