پيارا پيارا اسلامي ڀائرو! يقيناً الله پاڪ جي رحمت جي ڪا حد نه آهي، نيڪ هجي يا بد، پرهيزگار هجي يا بدڪار، فرمانبردار هجي يا نافرمان ۽ خطا ڪار، ربّ جي رحمت سڀني کي ملندي آهي۔

منقول آهي حضرتِ سيدُنا موسيٰ ڪليمُ الله عَـلٰى نَبِـيِّـنَا وَ عَـلَيْـهِ الـصَّلٰوة ُ وَالـسَّلَام پنهنجي  دُعا  ۾ عرض ڪيو: يارَبّ! الله پاڪ ارشاد فرمايو: لَبَّيڪ يا مُوسٰي! پاڻ عَـلَيْـهِ الـسَّـلاَم عرض ڪيو: مَولا! تون ته مالڪ آهين، منهنجي ڪهڙي حيثيت جو تون مون کي لبيڪ چئي جواب ڏين۔ ته الله پاڪ ارشاد فرمايو: مون کي اهو پسند آهي ته جيڪڏهن ڪو ٻانهو مون کي ”يا ربّ“ پڪاري ته مان ان کي ”لبيڪ“چئي جواب ڏيان۔

 حضرتِ سيدُنا موسيٰ عَـلَيْـهِ الـسَّـلاَم عرض ڪيو: يا ربّ! ڇا اهو هر فرمانبردار ٻانهي جي لاءِ آهي؟ رب پاڪ فرمايو: ها! بلڪ هر گنهگار ٻانهي جي لاءِ به آهي۔ ان تي حضرتِ سيدُنا موسيٰ عَـلَيْـهِ الـسَّـلاَم عرض ڪيو: فرمانبردار جي لاءِ ته ان جي اطاعت جي سبب آهي ۽ گنهگار تي اهو ڪرم ڪهڙي سبب؟ الله پاڪ جواب ارشاد فرمايو: اي موسيٰ! جيڪڏهن مان ڀلائي ڪرڻ واري کي ان جي ڀلائي جو بدلو ڏيان ۽ بُرائي ڪرڻ واري تي ان جي بُرائي جي ڪري احسان نه ڪيان ته منهنجو جُود ۽ ڪرم ڪيڏانهن ويندو؟          (حڪايتيں ۽ نصيحتيں، ص ٦٤١بتغير)

سُـبْحٰـنَ الـلّٰــه عَزَّوَجَلَّ! پيارا پيارا اسلامي ڀائرو! الله پاڪ جي رحمت ته اسان گناهگارن تي مِينهن وانگر وسي رهي آهي، پر اسان نادان ان جي رحمت کان پري گناهن ۾ ڦاٿل آهيون، الله پاڪ جي بارگاھ کان پري دنيا جي چڪرن ۾ ڦاٿل آهيون، ڏينهن رات الله پاڪ جي نافرمانين ۾ لڳل آهيون، نماز روزي کان پري گناهن جي دلدل ۾ دٻجندا پيا وڃون، اچو اچو! پنهنجو ڪنڌ ربِ ڪريم جي بارگاھ ۾ جھڪائي وٺو، پنهنجي گناهن کان سچي توبه ڪري ان کي راضي ڪري وٺو، ان جي رحمتن کي ماڻڻ جي لاءِ نيڪ، نمازي ۽ سنّتن تي عمل ڪرڻ وارا بڻجي وڃو۔