باجوں،موسیقی کی دُھنوں اور عورتوں کی نمائشوں سے بچتے ہوئے100فیصدی اسلامی معلومات فراہم  کرنا ممکن ہے،تواَلْحَمْدُلِلّٰہ عاشقانِ رسول کی مَدَنی تحریک دعوتِ اسلامی کی مرکزی مجلسِ شُوریٰ نے خوب کوشش کر کے رَمضانُ المبارَک ۱۴۲۹؁ھ بمطابق ستمبر 2008ء؁ سے مَدَنی چینل کے ذَرِیعے گھر گھر سُنّتوں کا پیغام عام کر نا شروع کر دیا،لوگوں کے گھر  کا ماحول پیار و مَحَبَّت میں تبدیل ہو گیا،مَدَنی چینل کی وجہ سے لوگوں کو شرعی مسائل سے آگاہی ہونے لگی اور دیکھتے ہی دیکھتے اس کے حیرت انگیزمَدَنی نتائج آنے لگے۔

صَلُّوْا عَلَی الْحَبِیْب!                                                      صَلَّی اللّٰہُ عَلٰی مُحَمَّد

عمامہ باندھنے کی سنتیں اور آداب

پیارے پیارے اسلامی بھائیو!آئیے!شیخِ طریقت،امیرِاہلسنَّت دَامَتْ بَـرَکاتُہُمُ الْعَالِیَہ  کے رسالے ’’163 مَدنی پُھول‘‘ سے عمامہ باندھنے کی چندسنتیں اور آداب سُنتے ہیں۔پہلےدو(2) فرامینِ مُصْطَفٰےصَلَّی اللّٰہُ تَعَالٰی عَلَیْہِ واٰلہٖ وَسَلَّمَ مُلاحظہ ہوں:(1)ارشاد فرمایا:عمامے کے ساتھ دو رَکعت نَماز بغیر عمامے کی70رَکعتوں سے اَفضل ہیں۔(فِرْدَوْس الْاخْبار،۲/۲۶۵ حدیث:۳۲۳۳)(2)عمامے عَرَب کے تاج ہیں تو عِمامہ باندھو تمہارا وقار بڑھے گا اور جو عمامہ باندھے اُس کے لئے ہر پیچ پر ایک نیکی ہے۔(کَنْزُالْعُمّال،۱۵/۱۳۳،رقم: ۴۱۱۳۸)٭دعوتِ اسلامی کے اِشاعتی ادارے مکتبۃ المدینہ کی کتاب،”بہارِشریعت“جلد3صفحہ نمبر660پر ہے:عمامہ کھڑے ہوکر باندھے اور پاجامہ بیٹھ کر پہنے، جس نے اس کا الٹا کیا (یعنی عمامہ بیٹھ کر باندھااور پاجامہ کھڑے ہو کرپہنا)وہ ایسےمَرَض میں مُبْتَلا ہوگا جس کی دوا نہیں۔

صَلُّوْا عَلَی الْحَبِیْب!                                                      صَلَّی اللّٰہُ تَعَالٰی عَلٰی مُحَمَّد