چهري تي وڌو ويو ته الله پاڪ انهن کي اکين جي بيماري مان شفا عطا فرمائي۔ هن مان معلوم ٿيو ته بزرگن سان نسبت رکڻ وارين شين کي تبرڪ سمجھڻ ۽ انهن مان برڪتون ماڻڻ انبياءِ ڪرام عَلَيهمُ السَّلَام جو طريقو رهيو آهي، ۽ هن واقعي کي قرآنِ پاڪ ۾ ذڪر ڪرڻ هن ڳالھ جو اعلان آهي ته تبرڪات مان فائدو ٿيندو آهي۔

صَلُّو ْا عَلَي الْحَبِيب!                                                                                               صَلَّي الله تَعَالٰي عَلٰي مُحَمَّد

ڏڪار مان ڇوٽڪارو ملي ويو!

           حضرتِ سيدنا شيخ عبدالحق محدثِ دهلوي رَحْمَةُ اللهِ تَعَالٰی عَلَيْه فرمائن ٿا: هڪ ڀيري سخت ڏُڪار پيو، ماڻهن جي گهڻين دعائن جي باوجود بارش نه ٿي۔ حضرت سيّدنا نظام الدين رَحْمَةُ اللهِ تَعَالٰی عَلَيْه جن پنهنجي امڙ سائڻ رَحْمَةُ اللهِ تَعَالٰی عَلَيْهَا جي ڪپڙي جو هڪ ڌاڳو هٿ ۾ کڻي عرض ڪيو؛ يا الله پاڪ! هي اُن عورت جي دامن جو ڌاڳو آهي جنهن تي ڪڏهن ڪنهن نامَحرم جي نظر نه پئي، منهنجا ڪريم رب! انهيءَ جي ئي صدقي رحمت جو مينهن وساءِ! اڃا دعا ختم به نه ٿي هئي جو رحمت جا ڪَڪَر ڇائنجي ويا ۽ ڇما ڇم برسات شروع ٿي وئي۔

                                                                                           (اخبار الاخيار، ص۲۹۴)

صَلُّو ْا عَلَي الْحَبِيب!                                                                                               صَلَّي الله تَعَالٰي عَلٰي مُحَمَّد

تبرڪات جا فائدا

      پياريون پياريون اسلامي ڀينرون!ٻڌو اوهان ته بزرگن جي جسم سان نسبت رکڻ واري لباس جي هڪ ڌاڳي جو به ڪيترو شان آهي جو ان کي هٿ ۾ رکي دعا ڪئي وئي ته قبول ٿي وئي۔ الله پاڪ جيڪو سمورين برڪتن جو مالڪ آهي ان ڪريم رب پنهنجي انهن نيڪ ٻانهن کي دنيا جهان جي اهڙين برڪتن سان نوازيو هوندو آهي جو جيڪي شيون انهن سان منسوب ٿي وڃن اهي به بابرڪت ٿي وينديون آهن۔ انبياءِ ڪرام عَلَيهمُ السَّلَام صحابه ڪرام عَـلَيْهِمُ الرِّضْوَانْ ۽ اولياءِ عظام رَحْمَةُ اللهِ تَعَالٰی عَلَيْهمْ اَجْمَعِين سان منسوب شيون وڏيون بابرڪت ۽ فيض واريون هونديون آهن، يعني انهن مقدس تبرڪات جو ادب ۽ احترام ڪرڻ وارن خوش نصيب عاشقانِ رسول کي انهن تبرڪات مان خوب فيض ملندو آهي ۔

تَبَرُّڪ ڪنهن کي چئبو آهي