اگر ہم یہ عظیمُ الشَّان  رات آسانی سے عِبادتِ الٰہی میں گُزارنے کے خواہش مند ہیں تو ہمیں چاہئے کہ عاشقانِ رسول کی صحبت میں ذِکر و نعت کے ان بابرکت اِجْتماعات میں لازمی شِرکت کریں  اور زہے نصیب کہ روزہ رکھنے کی بھی سعادت حاصل کریں،اس طرح بآسانی ہماری ساری رات عِبادَت میں بھی گُزر جائے گی اور دن میں روزے کی سعادت بھی حاصل ہوجائے گی۔ اِنْ شَآءَ اللہعَزَّ  وَجَلَّ 

میٹھے میٹھے اسلامی بھائیو!سانسوں کا کوئی بھروسا نہیں،نجانے کب یہ سانسیں رُک جائیں اور اس کے ساتھ ساتھ ہمارے اَعمال کا سِلسِلہ مَوقُوف ہوجائے۔لہٰذانیکیوں کا کوئی موقع ہاتھ سے نہ جانے دیں،اگر اللہعَزَّ  وَجَلَّ  کے فَضْل و کَرَم سے زِندگی میں ایک بار پھر رَجَب کا مُبارک مہینہ نصیب ہواتو ہمیں چاہئے کہ اِسے اپنی خُوش قسمتی سمجھتے ہوئے صِرف پہلی اور ستّائیسویں کا روزہ رکھنے کے بجائے جتنا بن پڑا،اس ماہ کے اَکْثَر ایّام روزے کے ساتھ گُزار دیں، کیا خبر یہی ہماری زِندگی کا آخری رَجَب ہو،احادیثِ مُبارکہ میں رَجَب کے نَفلی روزوں کے بہت سے فَضائل بیان کئے گئے ہیں۔آئیے!اس ضمن میں 4  اَحادیثِ مُبَارَکہ سُنتے ہیں۔

نفلی روزوں کے عظیمُ الشان فضائل

1.    حَضْرتِ سَیِّدُنا ابُوقِلابہ رَضِیَ اللہُ تَعَالٰی عَنْہُ فرماتے ہیں: رَجَب کے روزہ داروں کےلئے جَنَّت  میں ایک مَحَل ہے۔(شُعَبُ الایمان ج۳ص۳۶۸حدیث۳۸۰۲،از فیضانِ سُنّت،ص۱۳۶۵)

2.    حَضْرتِ سَیِّدُنا اَنَس بن مالِک رَضِیَ اللہُ تَعَالٰی عَنْہُ سے رِوایت ہےکہ رسول ِ مقبول صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے اِرْشاد فرمایا: جَنَّت  میں ایک نَہْر ہے جسے ”رَجَب“ کہا جا تا ہے جو دُودھ سے زِیادہ سفید اورشہدسے زِیادہ میٹھی ہے تو جو کوئی رَجَب کا ایک روزہ رکھے تو اللہ عَزَّ  وَجَلَّ اُسے اُس نَہْر سے سَیْراب کرے گا۔ (شُعَبُ الایمان ج۳ص۳۶۷حدیث۳۸۰۰،از فیضانِ سُنّت،ص۱۳۶۲)