اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ علٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہِ الرَّحْمٰنِ الرَّ حِیْم ^ط

دُرود شریف کی فضیلت:

دعوتِ اسلامی کے اِشاعتی اِدارے مکتبۃ المدینہ کی مطبوعہ271صفحات پر مشتمل کتاب"آبِ کوثر"کے صفحہ نمبر201،202پر جودرود شریف  کی فضیلت درج ہے،وہ سُنیے اور کثرتِ درود کی سچے دل سے نیّت کیجئے۔چنانچہ لکھا ہے ایک مریض نزع کی حالت میں تھا(یعنی اُس کی روح جسم سے نکلنے ہی والی تھی)،اس کا دوست تیمار داری کے لیے آیا اور دیکھ کر پوچھا !اے دوست،جاں کنی کی تلخی کا کیا حال ہے؟جواب دیا:مجھے کوئی تکلیف نہیں محسوس ہو رہی،کیونکہ میں نے علمائے کرام سے سُن رکھا ہے کہ جو شخص حبیبِ خدا،محمد ِمصطفی صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ پردرودِ پاک کی کثرت کرے،اُسے اللہ تعالیٰ موت کی تلخی سے امن دیتا ہے۔

صَلُّوْا عَلَی الْحَبِیْب!                                                       صَلَّی اللّٰہُ تَعَالٰی عَلٰی مُحَمَّدٍ

میٹھے میٹھے اسلامی بھائیو!یقیناً وہ اِسلامی بھائی بہت خُوش نصیب ہیں جواُٹھتے،بیٹھتے،چلتے پھرتے،سوتے جاگتے،وضو بے وضو،درود پڑھتے ہی رہتے ہیں،ان شاء اللہ عَزَّ  وَجَلَّ  کثرتِ درود کی سعادت حاصل کرنے کی برکت سے نزع کی سختیاں آسان ہو جائیں گی اورقبر و آخرت کی منزلیں بھی سہولت سے طے ہوں گی۔ ان شاء اللہ عَزَّ  وَجَلَّ 

بیٹھتے اُٹھتے جاگتے سوتے                   ہو  اِلٰہی مرا شعار درود

جان نکلے تو اس طرح نکلے                  تجھ پر اے غمزدوں کے یار درود