صَلُّوا عَلَی الْحَبیب!                                            صَلَّی اللّٰہُ تَعَالٰی عَلٰی مُحَمَّد

لاحول شریف کی برکت

معلوم ہوا کہ ” لَا حَوْلَ وَلَا قُوَّۃَ اِلَّا بِاللہِ الْعَلِیِّ الْعَظِیْمِ“پڑھنا شیطان کو بھگانے کا بہترین نُسخہ ہے، اس لئے جب شیطانی وساوس بندے کو گھیر لیں تو اسےچاہئے کہ فوراً ” لَا حَوْلَ وَلَا قُوَّۃَ اِلَّا بِاللہِ الْعَلِیِّ الْعَظِیْمِ“پڑھے ،اِنْ شَآءَ اللہعَزَّ  وَجَلَّ شیطان لعین کا منہ کالا ہوگا ۔ مُفَسّرِشہیر حکیمُ الْاُمَّت حضر تِ مفتی احمد یار خان عَلَیْہِ رَحمَۃُ الْمَنَّان  لکھتے ہیں:صُوفیائے کرام رَحِمَہُمُ اللّٰہ ُ السَّلَام فرماتے ہیں کہ جوکوئی صبح و شام اِکّیس (21) بار لاحول شریف (یعنی لَاحَوْلَ وَلَا قُوَّۃَ اِلاَّ بِاللہِ الْعَلِیِّ الْعَظِیْم) پانی پر دم کر کے پی لیاکرے تو اِنْ شَآءَ اللہعَزَّ  وَجَلَّ وَسوسۂ شیطانی سے اَمن میں رہے گا۔     (مِراٰۃالمناجیح ج1 ص87)

صَلُّوا عَلَی الْحَبیب!                                            صَلَّی اللّٰہُ تَعَالٰی عَلٰی مُحَمَّد

سیِّدُناغوث ِ اعظم رَضِیَ اللّٰہُ تَعَالٰی عَنْہ کا خوف ِ خُدا

میٹھے میٹھے اسلامی بھائیو! اللہ والوں  کا ہمیشہ سے یہ وطیرہ رہا ہے کہ ڈھیروں نیکیاں کرنے اور گناہوں سے بچنے کے باوجود وہ  بے پناہ خوفِ خدا اور خشیتِ الٰہی رکھتے ہیں ۔ سرکارِ بغداد حضور غوثِ پاک رَحْمَۃُ اللّٰہ ِتَعَالٰی عَلَیْہ بھی بے پناہ خوفِ خدا رکھتے تھے  چنانچہ حضرتِ سیِّدُناشیخ شَرْفُ الدِّین سَعْدِی شیرازی رحمۃ اللہ تعالیٰ علیہ فرماتے ہیں کہ حضرتِ سیِّدُنا شیخ عبدُالقادِر جیلانی قُدِّس سِرُّہٗ النُّورانی کو حَرَمِ کعبہ میں دیکھا گیاکہ کنکریوں پرسر رکھے بارگاہِ ربُّ العزّت عَزَّوَجَلَّ میں عرض گزار ہیں:”اے خُداوندِ کریم عَزَّ  وَجَلَّ!مجھے بخش دے اور اگرمیں سزاکاحَقْدار ہوں تو بروزِ قِیامت مجھے اَندھا اُٹھاناتاکہ نیکوکارلوگوں کے سامنے شرمندہ نہ ہوں ۔“ (گُلِسْتَانِ سَعْدِی ،ص۵۴ انتشارات عالمگیر ایران)