جواب : شریعت و طریقت دونوں کو جُدا جُدا راستے سمجھنا گمراہی ہے ۔ بعض جُہال اپنے ا ٓپ کو  نماز و روزہ اور شَریعت کے دِیگر اَحکام  سے مستثنیٰ (یعنی الگ ) سمجھتے اور اس طرح کی باتیں کرتے  سُنائی دیتے  ہیں کہ  شَریعت کے اَحکام تو اﷲ تعالیٰ تک پہنچنے کا ذَریعہ تھے اور ہم اﷲ تعالیٰ تک پہنچ گئے ، اب ہمیں شریعت کی کیا حاجت؟ ہم تو طریقت پر چل رہے ہیں ۔ ایسے لوگوں کو سنبھل جانا چاہیے کہ ایسی طریقت جو شریعت سے جُدا ہو وہ  خُدائے رَحمٰن  تک نہیں بلکہ شیطان تک پہنچائے گی ، جنَّت تک نہیں بلکہ جہنم میں لے جائے گی ۔چنانچہ اعلیٰ حضرت ، امامِ اہلسنَّت مولانا شاہ امام احمد رضا خان عَلَیْہِ رَحْمَۃُ الرَّحْمٰن فرماتے ہیں : شَریعت و طریقت ایک دوسرے سے جُدا اور مختلف راہوں کا نام نہیں بلکہ شَریعت کی اِتباع کیے بغیر خُدا تک پہنچنا محال ہے ۔ شَریعت راہ کو کہتے ہیں اور شَریعتِ محمدیہ کا معنیٰ ہے محمد صَلَّی اللّٰہُ تَعَالٰی عَلَیْہِ وَاٰلہٖ وَسَلَّم کی راہ اور یہ تمام اَحکام جسم و جان و رُوح وقلب و جملہ عُلُومِ اِلٰہیہ و مَعارفِ نامتناہیہ کو جامع ہے جن میں سے ایک ایک ٹکڑے کا نام طریقت و مَعرفت ہے ۔

اِسی طرح طریقت بھی راہ ہی کا نام ہے نہ کہ پہنچ جانے کا ، اب اگر وہ شَریعت سے جُدا ہو تو خُدا تک نہیں بلکہ شیطان تک پہنچائے گی ، جنَّت تک نہیں بلکہ جہنم میں لے جائے گی  کہ شَریعت کے سِوا سب راہوں کو قُرآنِ عظیم نے  باطِل و مَردود فرمایا ہے ۔ معلوم ہوا کہ طریقت یہی شَریعت اور اسی راہِ روشن کا ایک ٹکڑا ہے ۔ اس میں جو کچھ منکشف ہوتا ہے شریعت ہی کے اِتباع کا صَدقہ ہے ورنہ بے اتباعِ شَرع بڑے بڑے  کشف راہبوں ، جوگیوں اور سنیا سیوں کو دیئے جاتے ہیں ، پھر وہ کشف انہیں  دَردناک عذاب اور جہنم کی آگ تک پہنچاتے ہیں ۔ چنانچہ سیِّدُ الطائفہ حضرتِ سَیِّدُنا جنید بغدادی عَلَیْہِ رَحْمَۃُ اللّٰہ ِالْہَادِی سے عرض کیا گیا کہ” کچھ لوگ  یہ گمان  کرتے ہیں کہ اَحکامِ شریعت تو اللہ  عَزَّوَجَلَّ تک پہنچنے  کا ذَریعہ تھے اور ہم پہنچ گئے  اب ہمیں شَریعت کی کیا حاجت؟ “فرمایا :  وہ سچ کہتے ہیں ، وہ ضَرور پہنچ گئے مگر کہاں تک؟ جہنم تک ۔ چور اور زانی ایسے عقیدے والوں سے بہتر ہیں ۔ (پھر اپنے بارے میں اِرشاد فرمایا کہ میں ) اگر ہزار برس جیوں تو فرائض و واجبات تو بڑی چیز ہیں ، جو نوافل و مستحبات مقرر کر دیئے ہیں بے عُذرِ شَرعی ان میں کچھ کم نہ کروں ۔ ^{( [1] )}

منزل تک پہنچ جانے کے بعد اگر شَریعت کا اِتباع لازِم و ضَروری نہ  ہوتا تو سیِّدُالعالمین صَلَّی اللّٰہُ تَعَالٰی عَلَیْہِ وَاٰلہٖ وَسَلَّم اور اِمامُ الواصِلِین حضرتِ سَیِّدُنا علیکَرَّمَ اللّٰہُ تَعَالٰی وَجْہَہُ الْکَرِیْم ترکِ بندگی و اِتباع شَرع میں سب سے مُقَدَّم ہوتے مگر یہ بات ہر گز نہیں  بلکہ جس قدر قُربِ حق زیادہ ہوتا ہے شَرع کی باگیں اور زیادہ سخت ہوتی جاتی ہیں ۔سَیّدُ المَعصُومِینصَلَّی اللّٰہُ تَعَالٰی عَلَیْہِ وَاٰلہٖ وَسَلَّم رات بھر عبادات و نَوافل میں مَشغول اور کارِ اُمَّت کے لیے گِریاں و مَلُول رہتے ، نماز پنجگانہ تو حضور پر فرض تھی ہی نمازِ تہجد کا ادا کرنا بھی حضورِ اَقدس صَلَّی اللّٰہُ تَعَالٰی عَلَیْہِ وَاٰلہٖ وَسَلَّم پر لازِم بلکہ فرض قرار دیا گیا جب کہ اُمَّت کے لیے وہی سُنَّت کی سُنَّت ہے ^{( [2] )}۔ ^{( [3] )}اللہ عَزَّوَجَلَّ ہمیں نفس و شیطان کی شرارتوں سے محفوظ فرما کر شریعت و سُنَّت کے مُطابق اپنی زندگی گزارنے کی توفیق عطا فرمائے ۔اٰمِیْن بِجَاہِ النَّبِیِّ الْاَمِیْن صَلَّی اللّٰہُ تَعَالٰی عَلَیْہِ واٰلہٖ وَسَلَّم