٭…  جِھاد فی سَبِیلِ الله کے مُقابَلے میں اَمْرٌ بِالْـمَعْرُوْف وَ نَـھْیٌ عَنِ الْـمُنْکَر ایسے ہیں جیسے سمندر کے مُقابِل جھاگ۔

٭…  ممنوع کاموں سے بچتے ہوئے نفسانی خواہشات سے مُجاہَدہ کرنے کے مُقابِل جِھاد فی سَبِیلِ الله ایسے ہی ہے جیسے سمندر کے سامنے جھاگ۔^[1]

یہی مَفہوم ایک حدیثِ پاک میں بھی کچھ یوں مَرْوِی ہے کہ تم جِہادِ اَصْغَر سے جِہادِ اَکْبَر یعنی مُجاہَدۂ نفس کی جانِب لوٹے ہو۔^[2]

افضل منزل

حضرت سَیِّدُنا سَہْل بن عبداللہتُسْتَری عَلَیْہِ رَحمَۃُ اللہ ِالْقَوِی فرماتے ہیں:صَبْر صِدْق کی تصدیق کا نام ہے اور طاعَت کی سب سے اَفضل منزل پہلے مَعْصِیَّت پر، پھر طاعَت پر صَبْر کرنا ہے۔

مُجاہَدۂ نفس کی برکت

ایک اسرائیلی رِوایَت میں ہے کہ ایک شخص نے کسی دوسرے شہر کی ایک عورت سے شادی کی اور اپنے غلام کو بھیجا تاکہ وہ اسے لے آئے۔ راستے میں اس کے نَفْس نے اسے بَہُت پھسلایا اور گناہ کا مُطَالَبہ کیا مگر اس غلام نے نَفْس سے مُجاہَدہ کیا اور اللہ عَزَّ وَجَلَّ سے بچنے کے لیے مَدَد طَلَب کی تو اللہ عَزَّ وَجَلَّ نے اسے نبی بنا دیا اور یوں وہ نفس سے مُجاہَدہ کرنے کے سَبَب بنی اسرائیل کا نبی بن گیا۔^[3]

حضرت سَیِّدُنا موسیٰ عَلَیْہِ السَّلَام کے واقِعات میں سے ہے کہ آپ عَلَیْہِ السَّلَام نے حضرت سَیِّدُناخضر عَلَیْہِ السَّلَام سے فرمایا:اللہ عَزَّ وَجَلَّ نے کس وجہ سے آپ کو عِلْمِ غیب کی دولت سے نوازا ؟فرمایا:اللہ عَزَّ وَجَلَّ کی رَضا کی خاطِر گناہ تَرْک کرنے کی وجہ سے (مجھے عِلْمِ غیب کی دولت ملی ہے)۔

انعامِ خداوندی عمل کے اعتبار سے نہیں ہوتا

اللہ عَزَّ وَجَلَّ بَقَدْرِ عَمَل جزا عَطا نہیں فرماتا بلکہ عَطا و بخشش کی اِنتِہا کر دیتا ہے اور جب کوئی بندہ اس کی رِضا کے حُصُول کے لیے کوئی کام کرتا ہے تو وہ اسے بلاحِساب اَجَر سے نوازتا ہے۔

گناہ کو عادت نہ بنائے

توبہ کرنے والے کو چاہئے کہ وہ کسی گناہ کو اپنی عادت نہ بنائے ورنہ توبہ مشکل ہو جائے گی۔ کیونکہ عادت اللہ عَزَّ وَجَلَّ کے لشکروں میں سے ایک لشکر ہے۔ اگر گناہوں کی یہ عادت نہ ہو تی تو تمام لوگ توبہ کرنے والے ہوتے اور اگر آزمائش نہ ہوتی تو تمام توبہ کرنے والے اپنی توبہ پر ثابِت قَدَم رہتے۔چنانچہ،

مُریدِ صادِق کو چاہئے کہ اگر اس کی گناہوں بھری کوئی عادت ہو تو پہلے اسے خَتْم کرے پھر اگر اسے کسی نفسانی خواہش کے مُعامَلے میں آزمائش میں مبتلا کیا گیا ہو تو مُجاہَدۂ نَفْس پر صَبْر کرے۔

عمدہ خصلتیں

یہ عُمدہ خصلتیں مُریدوں کے اَفضل اور عُمدہ اَعمال سے تعلّق رکھتی ہیں۔ یہی وہ خَصْلتیں ہیں جب کسی مُرید میں پائی جاتی ہیں تو اس کے نَـفْسِ مُطْمَئِـنّہ کو رُشْد و تقویٰ کا اِلہام ہونے لگتا ہے اور انہی خصلتوں کے ذریعہ ایک مُریدِ صادِق نَفْسِ اَمّارہ کے اَوصاف سے آزاد ہو کر نَـفْسِ مُطْمَئِـنّہ اور اِیمان و قرآن کے اَخلاق و اَوصاف کا پیکر بن جاتا ہے۔ یہ مَفہوم دَرْج ذیل حدیثِ پاک سے ماخوذ ہے۔ چنانچہ،

سرکارِ نامدار، مدینے کے تاجدار صَلَّی اللہ تَعَالٰی عَلَیْہِ وَاٰلِہٖ وَسَلَّم کا فرمانِ خوشبودار ہے:اَفضل اَعمال وہ ہیں جنہیں تمہارے نَفْس ناپسند کرتے ہوں۔^[4]   کیونکہ نَفْس کو مُخالَفتِ خواہش پسند نہیں، جبکہ خواہشِ نَفْس حَق

کے مُخالِف ہے اور حَق اللہ عَزَّ وَجَلَّ کو پسند ہے، لہٰذا بندہ نَفْس کو مُخالَفتِ خواہش اور مُوافِقِ حَق پر مجبور کرنے والا بن جاتا ہے کیونکہ حَق کی مَحبّت سب سے اَفضل عَمَل ہے۔ جیسا کہ فرمانِ باری تعالیٰ ہے:

وَ الْوَزْنُ یَوْمَىٕذِ ﹰالْحَقُّۚ- (پ ۸، الاعراف:۸)                         ترجمۂ کنز الایمان:اور اس دن تول ضَرور ہونی ہے۔

(صَاحِبِ کِتاب اِمامِ اَجَلّ حضرت سَیِّدُنا شیخ ابُو طالِب مکّی عَلَیْہِ رَحمَۃُ اللہ ِالْقَوِی فرماتے ہیں کہ ایک دوسرے مَقام پر) نقصان اٹھانے والوں میں سے ان لوگوں کو مستثنیٰ قرار دیا گیا ہے جو آپس میں ایک دوسرے کو حَق بات کی وَصیّت اور صَبْر کی تلقین کرتے ہیں۔ یہ یقین کی اِبْتِدَا ہے۔

گناہوں میں غرق شخص کی مثال

کسی نیک شخص کے مُتعلِّق مَرْوِی ہے کہ وہ کیچڑ میں پیدل چل رہے تھے ، چلتے ہوئے بَہُت محتاط تھے اور اپنے لِباس کو پنڈلیوں سے اوپر اٹھایا ہوا تھا، راستے کے ایک جانِب چلتے ہوئے اچانک ان کا پاؤں پِھسْلا تو دونوں پاؤں کیچڑ کے درمیان رکھ کر چلنے لگے۔ پھر اچانک رونے لگے، عرض کی گئی:کیوں رو رہے ہیں؟ فرمانے لگے: یہ اس بندے کی مِثال ہے جو گناہوں سے بچتا اور ان سے دُور رہتا ہے مگر جب ایک یا دو۲گناہوں میں مبتلا ہوتا ہے تو اس کے بعد گناہوں میں ہی لَت پَت ہو جاتا ہے۔

غفلت پر توبہ لازِم ہے

بندے پر لازِم ہے کہ جس غفلت کا مُرْتکِب ہو اس سے توبہ کرے، جب اس نے اس بات کی حقیقت کو پہچان لیا تو کبھی بھی اس کی توبہ خَتْم نہیں ہو گی۔ بے شک اللہ عَزَّ وَجَلَّ نے دنیا