حقیقت بھی یہی ہے جیسا انہوں نے اِرشَاد فرمایا۔ اس لیے کہ اللہ عَزَّ  وَجَلَّ نے بندوں پر جو بعض مالی حُقُوق لازِم قرار دیئے اور ان کے اَمْوَال میں جو زکاۃ فَرْض کی ہے وہ انہی لوگوں کے لیے ہے،  کیونکہ یہ اس کے عَیال ہیں،ان کی کوئی تِجَارَت ہے نہ کوئی صَنْعَت۔^[1]چنانچہ ان کی مَعاش کی ذِمَّہ داری تاجِروں اور کاریگروں پر ڈال دی۔ کیا آپ نے دیکھا نہیں کہ زکاۃ لینا کسی تاجِر کے لیے جائز ہے نہ کسی کاریگر کے لیے، کیونکہ دو۲جہاں کے تاجْوَر، سلطانِ بَحرو بَر صَلَّی اللہ تَعَالٰی عَلَیْہِ وَاٰلِہٖ وَسَلَّم کا فرمانِ عالیشان ہے:صَدَقَہ (یعنی زکاۃ) کسی مال دار کے لیے جائز ہے نہ کسی طاقتور کمائی کرنے والے  کے لیے۔ ^[2]

(صَاحِبِ کِتاب اِمامِ اَجَلّ حضرت سَیِّدُنا شیخ ابُو طالِب مکّی عَلَیْہِ رَحمَۃُ اللہ ِالْقَوِی فرماتے ہیں)یہاں سرورِ کائنات ، فَخْرِ مَوجُودات صَلَّی اللہ تَعَالٰی عَلَیْہِ وَاٰلِہٖ وَسَلَّم نے کمائی کرنے کو مال داری کے قائم مَقام قرار دیا ہے۔   

فرمانِ باری تعالیٰ ہے:(وَ جَعَلْنَا لَكُمْ فِیْهَا مَعَایِشَ وَ مَنْ لَّسْتُمْ لَهٗ بِرٰزِقِیْنَ(۲۰)  (پ ۱۴، الحجر:۲۰) ^[3] )یعنی ہم نے بنا دئیے تمہارے لیے بھی اس میں رِزْق کے سامان اور ان کے لیے بھی جنہیں تم روزی دینے والے نہیں ہو۔ اس آیتِ مُبارَکہ میں غور کرنے سے مَعْلُوم ہوتا ہے کہ جن لوگوں کو وہ روزی پہنچانے والے نہیں ان سے مُراد وہ لوگ ہیں جن کا زمین میں کوئی ذریعۂ مَعاش نہیں کہ جس سے وہ کما سکیں۔ یہ لوگ اللہ عَزَّ  وَجَلَّ کے عَیال ہیں،  ان کا شُمار اس کے اَہْل میں ہوتا ہے نہ کہ دنیا کے اَہْل میں، کیونکہ دنیادار دنیا کی خاطِر کمائی کرتے اور اس کی وجہ سے پریشان رہتے ہیں۔

تین۳آیات سے اپنے حال پر مدد طَلَب کی

حضرت سَیِّدُنا عامر بن عبداللہ رَحِمَہُ اللہ فرماتے ہیں کہ میں نے قرآنِ کریم میں تین۳ آیاتِ مُبارَکہ  پڑھیں تو ان سے اپنے حال پر مدد طَلَب کی۔ چنانچہ،

پہلی آیتِ مُبارَکہ : جب میں نے یہ فرمانِ باری تعالیٰ پڑھا:

وَ اِنْ یَّمْسَسْكَ اللّٰهُ بِضُرٍّ فَلَا كَاشِفَ لَهٗۤ اِلَّا هُوَۚ-وَ اِنْ یُّرِدْكَ بِخَیْرٍ فَلَا رَآدَّ لِفَضْلِهٖؕ- (پ ۱۱، یونس:۱۰۷)

ترجمۂ کنز الایمان:اور اگر تجھے اللہ کوئی تکلیف پہنچائے تو اس کا کوئی ٹالنے والا نہیں اس کے سِوا اور اگر تیرا بھلا چاہے تو اس کے فَضْل کا ردّ کرنے والا کوئی نہیں۔

تو خود سے کہا: اگر اللہ عَزَّ  وَجَلَّ مجھے کوئی نُقْصَان پہنچانا چاہے تو کوئی مجھے نَفْع دینے پر قادِر نہیں ہو سکتا اور اگر وہ مجھے کوئی نِعْمَت عَطا فرمانا چاہے تو کوئی اسے مجھ سے روک نہیں سکے گا۔

دوسری آیتِ مُبارَکہ :جب میں نے یہ آیَتِ مُبارَکہ پڑھی :

فَاذْكُرُوْنِیْۤ اَذْكُرْكُمْ (پ ۲، البقرة:۱۵۲)                                     ترجمۂ کنز الایمان:تو میری یاد کرو میں تمہارا چرچا کروں گا۔

تو اس کے سِوا ہر ایک کی یاد سے منہ موڑ کر صِرف اسی کی یاد میں مگن ہو گیا۔

تیسری آیتِ مُبارَکہ : جب سے میں نے یہ آیَتِ مُبارَکہ پڑھی ہے:

وَ مَا مِنْ دَآبَّةٍ فِی الْاَرْضِ اِلَّا عَلَى اللّٰهِ رِزْقُهَا (پ ۱۲، ھود: ۶)                

ترجمۂ کنز الایمان:اور زمین پر چلنے والا کوئی ایسا نہیں جس کا رِزْق اللہ کے ذمّۂ کَرَم پر نہ ہو۔ 

اللہ عَزَّ  وَجَلَّ کی قَسَم! اپنے رِزْق کا اِہتِمام نہیں کیا بلکہ آرام میں ہوں۔

اَسباب پر نظر

حضرت سَیِّدُنا سَہْل بن عبداللہ تُسْتَری عَلَیْہِ رَحمَۃُ اللہ ِالْقَوِی فرماتے ہیں:  مُتَوکِّل جب سَبَب پر اپنی نِگاہ رکھے تو وہ محض تَوَکُّل کا دعویٰ کرنے والا ہے۔ ایک مرتبہ اِرشَاد فرمایا: اِیمان کے ساتھ اَسباب کا کوئی تعلّق نہیں بلکہ اَسباب تو اِسلام میں ہوتے ہیں۔ مُراد یہ ہے کہ اِیمان کی حقیقت میں اَسباب پر نَظَر ہوتی ہے نہ ان سے سُکُون حاصِل ہوتا ہے بلکہ اَسباب پر نَظَر رکھنا اور مَخلوق میں طَمَع کا پایا جانا مَقامِ اِسلام میں پایا جاتا ہے۔

اسی لیے حضرت سَیِّدُنا لقمان رَضِیَ اللہ تَعَالٰی عَنْہ نے اپنے جگرگوشے سے اِرشَادفرمایا:اِیمان کے چار۴ اَرکان ہیں، اِیمان ان کے بغیر دُرُسْت نہیں ہو سکتا جیسا کہ جِسْم دونوں ہاتھوں اور پاؤں کے بغیر دُرُسْت نہیں ہوتا۔

(وہ اَرکان یہ ہیں:) (1) ۔۔۔۔ اللہ عَزَّ  وَجَلَّ پر تَوَکُّل رکھنا (2) ۔۔۔۔ اس کی قَضا کو تسلیم کرنا (3 )۔۔۔۔ اپنا ہر مُعَامَلہ اللہ عَزَّ  وَجَلَّ کے سُپُردکر دینا اور (4 )۔۔۔۔ اللہ عَزَّ  وَجَلَّ کی تقدیر پر راضی رہنا۔   

مُتَوکِّل کا حال

مُتَوکِّل کا حال یہ ہے:

٭…اس کا دِل بندوں کی طرف دیکھنا خَتْم کر دیتا ہے۔

٭…مخلوق کے قبضے میں مَوجُود اَشیا میں طَمَع کی فِکْر سے آزاد ہو جاتا ہے۔

٭…اس کا دِل دِلوں کو پھیرنے والی اور تدبیر فرمانے والی ذات یعنی اللہ عَزَّ  وَجَلَّ سے لگ جاتا ہے۔