ہے۔ ایک رِوایَت میں ہے کہ حضور نبی پاک، صاحبِ لَوْلاک صَلَّی اللہ تَعَالٰی عَلَیْہِ وَاٰلِہٖ وَسَلَّم نے اِرشَاد فرمایا:دُعا نِصف عِبادَت ہے۔^[1]  اور اللہ عَزَّ وَجَلَّ صِرف مُخْلِص بندے کی ہی دُعا قبول فرماتا ہے۔

ایک دعا تین۳کرم نوازیاں

بندے پر دُعا کی وجہ سے تین۳کَرَم نوازیاں ہوتی ہیں۔ چنانچہ،

٭…سب سے کم کَرَم نوازی یہ ہوتی ہے کہ اس کے نامۂ اَعمال میں اس دُعا کی وجہ سے ایک نیکی لکھ دی

جاتی ہے جس کا اجر 10 سے 700 گنا تک ملتا ہے۔

٭…سب سے اعلیٰ کَرَم نوازی یہ ہوتی ہے کہ اللہ عَزَّ وَجَلَّ اس کی دُعا کو آخِرَت میں اس کے لیے ذخیرہ فرما دیتا ہے جو اس کے لیے دنیا و مافیہا کی ان تمام بھلائیوں سے بہتر ہےجن کا خیال بھی اس کے دل میں کبھی نہیں آیا۔یہ سب اس کے اللہ عَزَّ وَجَلَّ سے حُسْنِ ظَن رکھنے کی بنا پر ہے۔

٭… مُتَوسِّط کَرَم نوازی یہ ہوتی ہے کہ اس سے وہ مصیبت دُور کر دی جاتی ہے جو اگر آتی تو اس سے چھٹکارا اس کے لیے سب سے اَہَم ہوتا اور اسے اپنی مانگی ہوئی چیز سے اس مصیبت کا دُور ہونا زیادہ پسند ہوتا۔

ایک دعا تین۳عطائیں

اللہ عَزَّ وَجَلَّ کے مَحبوب، دانائے غُیوب صَلَّی اللہ تَعَالٰی عَلَیْہِ وَاٰلِہٖ وَسَلَّم کا فرمانِ عالیشان ہے:جب کوئی دعا مانگنے والا دُعا کی قبولِیَّت کا یقین رکھتے ہوئے دُعا کرتا ہے اور اس کی یہ دُعا اللہ عَزَّ وَجَلَّ کی نافرمانی کا باعِث ہو نہ قَطْع رِحْـمی کا تو اللہ عَزَّ وَجَلَّ اسے تین۳باتوں میں سے ایک ضَرور عَطا فرماتا ہے۔ یعنی یا تو اس کی مانگی ہوئی شے اسے عَطا فرما کر اس کی دُعا کو شَرَفِ قبولِیَّت سے نوازتا ہے یا اس سے اس جیسی کوئی بُرائی دور فرما دیتا ہے یا اس دُعا کے بدلے اس کے لیے آخِرَت میں ڈھیروں اَجَر و ثواب جَمْع فرما دیتاہے۔^[2]

خالق مخلوق میں سب سے زیادہ کس پر ناراض؟

حضرت سَیِّدُناموسیٰ عَلَیْہِ السَّلَام کے مُتَعَلِّق مَرْوِی ہے کہ آپ عَلَیْہِ السَّلَام نے بارگاہِ خداوندی میں عَرْض کی:اے میرے رب! تو اپنی مَخلوق میں سب سے زیادہ کس پر ناراض ہوتا ہے؟ اللہ عَزَّ وَجَلَّ نے اِرشَادفرمایا:جو میری قَضا پر راضی نہ ہو اور جو کسی مُعامَلے میں اِستخارہ کرے پھر میں اس کے لیے کسی فیصلے کو ظاہِر فرما دوں تو وہ اسے ناپسند کرے۔^[3]

خالِق کی پسندو ناپسند

ایک رِوایَت میں ہے کہ حضرت سَیِّدُنا موسیٰ عَلَیْہِ السَّلَام نے عَرْض کی: اے میرے رب! تو کس شے کو زیادہ پسند اور کس کوزیادہ ناپسند کرتا ہے؟ اللہ عَزَّ وَجَلَّ نے اِرشَاد فرمایا: مجھے سب سے زیادہ پسند میری قَضا پر راضِی رہنا ہے اور سب سے زیادہ ناپسند یہ ہے کہ تو اپنے نَفْس کی تعریف کرے۔^[4]

آقا کی نصیحت

مَرْوِی ہے کہ ایک شخص نے سرکارِ نامدار، مدینے کے تاجدار صَلَّی اللہ تَعَالٰی عَلَیْہِ وَاٰلِہٖ وَسَلَّم کی بارگاہِ بے کس پناہ میں عَرْض کی:مجھے کوئی نصیحت فرمائیے۔ تو آپ صَلَّی اللہ تَعَالٰی عَلَیْہِ وَاٰلِہٖ وَسَلَّم نے اِرشَادفرمایا:اللہ عَزَّ وَجَلَّ نے جس شے کا فیصلہ تیرے حَق میں نہ کیا ہو اس میں اللہ عَزَّ وَجَلَّ کو اِلزام نہ دو۔^[5]

خدا کے ہر فیصلے میں خیر ہی خیر ہے

ایک رِوایَت میں ہے کہ دو۲جہاں کے تاجْوَر، سلطانِ بَحرو بَر صَلَّی اللہ تَعَالٰی عَلَیْہِ وَاٰلِہٖ وَسَلَّمنے آسمان کی جانِب دیکھا اور مسکرا دئیے، اس کے مُتَعَلِّق عَرْض کی گئی تو اِرشَاد فرمایا:میں اللہ عَزَّ وَجَلَّ کے مومِن کے مُتَعَلِّق کیے گئے فیصلوں پر مُتَـعَجَّب ہوا کہ مومِن کے لیے اس کے ہر فیصلے میں خیر ہی خیر ہے، اگر مومِن کے لیے خوش حَالی کا فیصلہ کیا گیا اور وہ اس پر راضی رہے تو یہ اس کے لیے خیر کا باعِث ہے اور اگر اس کے لیے تنگ دستی کا فیصلہ کیا جائے پھر بھی وہ راضی رہے تو یہ بھی اس کے لیے خیر کا باعِث ہے۔^[6]

حُسْنُ الظَّنِّ بِالله سے مُراد

حُسْنُ الظَّنِّ بِالله یعنی اللہ عَزَّ وَجَلَّ کے ساتھ حُسْنِ ظَن یہ ہے کہ خوب رَغْبَت كی بنا پر اس كی حَمد و ثَنا

بیان كی جائے۔ جیسا کہ فرمانِ مصطفےٰ صَلَّی اللہ تَعَالٰی عَلَیْہِ وَاٰلِہٖ وَسَلَّم ہے:اللہ عَزَّ وَجَلَّ کے ساتھ حُسْنِ ظَن اس کی بہترین عِبادَت کرنا ہے۔^[7]

سَیِّدُنا آدم عَلَیْہِ السَّلَام  کو سکھائے گئے کلمات سے مراد

فرمانِ باری تعالیٰ ہے:

فَتَلَقّٰۤى اٰدَمُ مِنْ رَّبِّهٖ كَلِمٰتٍ فَتَابَ عَلَیْهِؕ- (پ ۱، البقرة:۳۷)